Lögreglan á höfuðborgarsvæðinu brást við nokkrum útköllum í dag, meðal annars vegna óspekta, umferðarlagabrota og handtaka vegna ölvunar og fíkniefnaneyslu.
Óljós tilkynning barst lögreglu um öskur og læti frá íbúð í Reykjavík. Þegar lögregla kom á vettvang sáust brotnir munir fyrir aftan húsið og stóð einn íbúi á svölum og öskraði. Þegar lögreglumenn reyndu að nálgast manninn í gegnum sameign hússins sprautaði hann slökkvitæki að þeim og kastaði því síðan niður stiga í átt að lögreglumönnunum. Lögreglu tókst að komast inn í íbúð mannsins þar sem hann ræddi við lögreglumenn en þótti óútreiknanlegur. Hann var handtekinn og vistaður í fangaklefa. Í íbúðinni sáust meðal annars hnífaför í vegg og merki um áfengis- og fíkniefnaneyslu. Maðurinn var vistaður í klefa þar til unnt verður að taka af honum skýrslu.
Þá barst tilkynning um glannalegan akstur á snjómoksturstæki. Við nánari athugun kom í ljós að ökumaðurinn var undir áhrifum vímuefna og jafnframt sviptur ökuréttindum. Hann var handtekinn og farið með hann í blóðsýnatöku.
Lögregla stöðvaði einnig mann við matvöruverslun í Kópavogi sem reyndist vera eftirlýstur og undir áhrifum áfengis. Við leit fannst útdraganleg kylfa í fórum hans. Maðurinn var handtekinn og vistaður í fangaklefa.
Í öðru máli var tilkynnt um ökumann sem hafði ekið á bifreið tilkynnanda og yfirgefið vettvang án þess að stöðva. Tilkynnandi elti bifreiðina heim til ökumannsins þar sem tveir menn voru í henni. Lögregla fann mennina síðar í íbúð þar sem annar þeirra hafði falið sig í fataskáp. Mennirnir neituðu báðir að hafa ekið bifreiðinni og reyndust báðir vera ölvaðir. Þeir voru handteknir og vistaðir í fangaklefa.
Að lokum aðstoðaði lögregla ökumann sem hafði ekið á ljósastaur með þeim afleiðingum að bifreiðin hafnaði utan vegar. Ökumaðurinn slapp óslasaður og bifreiðin reyndist enn ökufær.
Athugasemdir