Samkvæmt greiningu fyrirtækisins SCOOPER jókst umræða á samfélagsmiðlum um Itamar Ben-Gvir gríðarlega í gær og náði hámarki í nótt, eftir að ísraelski þjóðaröryggisráðherrann birti umdeilt myndskeið á netinu, þar sem hann ræðst á og niðurlægir aðgerðarsinna úr hjálparflotanum sem reyndu að koma hjálpargögnum til Gaza sjóleiðis. Þetta kemur fram í frétt ísraelska fréttamiðilsins Maariv.
SCOOPER, sem sérhæfir sig í greiningu á umræðu og frásögnum á samfélagsmiðlum, segir að um hálf milljón færslna og ummæla um Ben-Gvir hafi birst á netinu á skömmum tíma. Umræðan hafi verið yfirgnæfandi neikvæð og gagnrýnin gagnvart Ísrael.
Mesta aukningin mældist í umræðu á indónesísku, en enska og spænska voru þau tungumál þar sem umfjöllunin varð hvað útbreiddust.
Samkvæmt greiningunni hófst umræðan að aukast verulega síðdegis í gær og náði hámarki í morgunsárið, þegar tugþúsundir færslna um Ben-Gvir birtust á hverri klukkustund.
SCOOPER segir þetta dæmi um „gríðarlega útbreiðslu atburðar“ sem hafi kallað fram hörð viðbrögð frá leiðtogum, utanríkisráðherrum og stórum fjölmiðlum víða um heim.
Enska var langmest notaða tungumálið í umræðunni, með um 220 þúsund færslur frá um 100 þúsund mismunandi notendum. Sú umræða skapaði um eina milljón viðbragða, þar á meðal læk, deilingar og athugasemdir.
Spænska var næststærsta tungumálið með um 65 þúsund færslur um Ben-Gvir og yfir 273 þúsund viðbrögð. Þar á eftir kom ítalska, þar sem umræða jókst um 37 prósent og náði rúmlega 40 þúsund færslum, meðal annars í kjölfar opinberrar gagnrýni frá stjórnvöldum í Róm.
Á frönsku mældust um 35 þúsund færslur og á tyrknesku um 22.700 færslur. Þar jókst virkni notenda um meira en 400 prósent. Á indónesísku jókst umfang umræðunnar um rúm 435 prósent.
„Niðurlægjandi“ og „ómannúðlegt“
Samkvæmt SCOOPER snerist alþjóðlega umræðan ekki fyrst og fremst um stöðvun hjálparflotans sjálfs, heldur um framgöngu Ben-Gvirs og myndbandið sem hann birti.
Algengustu lýsingarnar á myndskeiðinu í alþjóðlegri umræðu voru meðal annars að það væri „niðurlægjandi“, „ómannúðlegt“ og „meðvituð pólitísk ögrun“.
Þá segir í greiningunni að neikvæð umræða hafi aukist enn frekar vegna harðrar gagnrýni innan Ísraels sjálfs, þar á meðal frá Benjamin Netanyahu forsætisráðherra og Gideon Sa'ar utanríkisráðherra.
Athugasemdir