Athafnamaðurinn Fjölnir Þorgeirsson hefur birt myndir af tveimur ungum einstaklingum sem hann segir hafa stolið rafmagnshlaupahjóli af syni sínum síðdegis í gær.
Samkvæmt upplýsingum frá Fjölni á þjófnaðurinn að hafa átt sér stað við Gulaþing. Í færslu sem hann birti á samfélagsmiðlum óskar hann eftir aðstoð almennings við að hafa uppi á hjólinu og hvetur þá sem kunna að búa yfir upplýsingum um málið til að hafa samband við sig. Þar birtir hann einnig símanúmer sitt.
Fjölnir birti upphaflega mynd sem sýnir einstaklingana tvo, en síðar birti hann útgáfu af myndinni sem hafði verið unnin með aðstoð gervigreindar í þeim tilgangi að skerpa myndgæði og gera andlit einstaklinganna sýnilegri.
Notkun gervigreindar við slíka myndvinnslu hefur þó vakið athygli í athugasemdum við færsluna. Þar hafa sumir bent á að gervigreind geti búið til eða breytt smáatriðum í myndum með þeim afleiðingum að útkoman endurspegli ekki endilega raunverulegt útlit þeirra sem á myndunum eru. Því geti slík vinnsla haft áhrif á áreiðanleika myndefnis þegar verið er að reyna að bera kennsl á einstaklinga.
Ekki liggur fyrir hvort lögreglu hafi verið tilkynnt um málið.
Athugasemdir