Einstaklega vandað og mikið endurnýjað einbýlishús við Mávanes 18 í fúnkísstíl á Arnarnesi í Garðabæ hefur verið sett á sölu. Ásett verð er 329,9 milljónir króna.
Húsið stendur við eina af dýrustu og eftirsóttustu götum landsins, í grónu einbýlishúsahverfi á Arnarnesi. Eignin var reist árið 1966 og er skráð 312 fermetrar að stærð, þar af er 49,2 fermetra innbyggður bílskúr.
Húsið stendur á 1.486 fermetra eignarlóð og hefur verið mikið endurnýjað. Þar eru meðal annars rúmgóðar og bjartar stofur, sex herbergi og þrjú baðherbergi. Þá er stór bílskúr við húsið og bílastæði fyrir allt að sex bifreiðar.
Mikið hefur verið lagt í lóðina og útisvæði eignarinnar. Þar er gróinn og skjólgóður garður, gróðurhús og grillskýli. Við húsið er jafnframt rúmgóð flísalögð verönd með heitum potti og rafdrifinni markísu.
Húsið var hannað af Guðmundi Kr. Kristinssyni arkitekt. Hann kom að hönnun fjölmargra þekktra mannvirkja á Íslandi, ýmist sjálfstætt eða í samstarfi við aðra arkitekta. Þar má nefna Háskólabíó, mannvirki við Búrfells- og Sigölduvirkjanir, Breiðholtskirkju, Kuðunginn við Ægisíðu og Esso-húsið við Suðurlandsbraut.
Arnarnes hefur lengi verið meðal eftirsóttustu og dýrustu einbýlishúsahverfa höfuðborgarsvæðisins. Hverfið einkennist af stórum lóðum, gróðri og rúmu bili milli húsa. Stutt er jafnframt í göngu- og hjólaleiðir meðfram strandlengjunni.
Athugasemdir