Tveir einstaklingar hafa verið dæmdir í skilorðsbundið fangelsi fyrir peningaþvætti eftir að lögregla fann samtals 23.845 evrur, sem eru rúmar þrjár milljónir króna, í reiðufé í farangri þeirra hér á landi. Hluti rannsóknarinnar snerist meðal annars um samskipti þar sem annar þeirra mæltist til þess að fá peninga afhenta á veitingastaðnum Duck and Rose í miðborg Reykjavíkur.
William Ankrah Marcha var dæmdur í fimm mánaða fangelsi og Kade Diallo í þrjá mánuði. Refsingar þeirra voru skilorðsbundnar til tveggja ára. Þá voru 23.845 evrurnar gerðar upptækar ásamt vöxtum og verðbótum.
Málið á rætur að rekja til 7. mars 2023 þegar lögregla stöðvaði bifreið við almennt eftirlit á Ásbrú í Reykjanesbæ. William og Kade voru farþegar í bifreiðinni og voru þau ásamt öðrum flutt á lögreglustöð. Við leit fundust 16.845 evrur í handtösku og ferðatösku Kade en 7.000 evrur í ferðatösku William. Hluti peninganna var falinn í jakka og hluti í vösum á gallabuxum.
Við rannsókn á farsímum William komu fram samskipti sem vöktu athygli lögreglu. Þann 7. mars sendi hann skilaboð á símanúmer sem var vistað undir nafni annars manns í síma hans og spurði hvort viðkomandi gæti komið með peningana til hans. Maðurinn kvaðst geta það og mæltu þeir sér mót á veitingastaðnum Duck and Rose í miðborg Reykjavíkur. Í öðrum samskiptum í símanum var meðal annars rætt um peninga og fíkniefni og þar fundust einnig myndbönd þar sem marijúana sást.
William sagði fyrir dómi að maðurinn sem hann ætlaði að hitta hefði verið vinur hans. Hann hefði keypt af honum kannabis og greitt fyrir það en maðurinn ætti eftir að gefa honum til baka. Dómurinn taldi skýringu hans á skilaboðunum afar ótrúverðuga.
Framburður Williams og Kade um uppruna og eignarhald peninganna breyttist ítrekað við rannsókn málsins. Meðal annars komu fram mismunandi skýringar um hvort um væri að ræða sparifé, vinnulaun eða sameiginlegt fé þeirra. Dómurinn taldi framburð þeirra ruglingslegan og ótrúverðugan. Þá þótti afar ósennilegt að William hefði ferðast til Íslands með fjárhæð sem nam nærri árslaunum hans.
Dómurinn taldi einnig að það hvernig peningunum hafði verið komið fyrir í farangrinum benti til þess að reynt hefði verið að fela þá. Engar haldbærar skýringar hefðu komið fram um uppruna fjármunanna og var talið sannað að þeir væru ávinningur af refsiverðum brotum.
Athugasemdir