Einkaþjálfarinn og áhrifavaldur Guðmundur Emil Jóhannsson, oft nefndur Gummi Emil, hefur vakið athygli með færslu á samfélagsmiðlum þar sem hann fjallar meðal annars um innflytjendamál, múslima, verðbólgu og íslensk stjórnmál.
Guðmundur deildi þar skjáskoti af fyrri færslu sinni sem hann segir hafa fengið óvenjumikil viðbrögð. Hann segir viðbrögðin til marks um að viðhorf fólks séu að breytast. Rétt er þó að taka fram að Guðmundur hefur eytt færslunni af samfélagsmiðlum en hún var til umræðu í Facebook-hópum Afhjúpum kvenfyrirlitningu, rasisma og almennt hatur á samfélagsmiðlum.
„Fólk er að vakna á Íslandi en það eru enn margir steinsofandi lifandi í afneitun. Það þarf meiriháttar breytingu,“ skrifar Guðmundur og fullyrðir jafnframt að múslimar beri „enga virðingu fyrir vestrænum konum“.
Í færslunni sem Guðmundur deilir gagnrýnir hann meðal annars hversu kostnaðarsamt sé að eignast börn á Íslandi. Hann tengir þá umræðu við innflytjendamál og heldur því fram að útlendingar eignist mörg börn og fái ríflegar bætur og styrki.
Guðmundur beinir einnig spjótum sínum að stjórnmálamönnum og segist telja að engan stjórnmálamann finna sem sé „nógu sterkur“ til að ná tökum á verðbólgunni. Þá gagnrýnir hann fólk sem hann skilgreinir sem vinstrisinnað og frjálslynt og sakar það meðal annars um að „hata sitt eigið land og sitt fólk“. Vísar hann sérstaklega í þennan hóp sem „vinstri libba“.
Guðmundur hefur áður vakið athygli í íslenskri fjölmiðlaumfjöllun vegna ummæla sinna og atvika í einkalífi. Hann hefur meðal annars sagt frá því að hafa verið kallaður í skýrslutöku hjá lögreglu eftir að hann birti mynd af sér með tvær óhlaðnar veiðibyssur.
Hann hefur einnig gert athugasemdir við úrslit Íslandsmóts í fitness fyrra á árinu og haldið því fram að hann hafi verið rændur sigrinum í keppninni.
Þá vakti mál Guðmundar talsverða athygli árið 2024 þegar hann fannst nakinn við Suðurlandsveg. Guðmundur greindi sjálfur frá því í kjölfarið að hann hefði neytt ofskynjunarsveppa fyrir atvikið.
Nýjasta færsla hans hefur nú bæst við þær yfirlýsingar Guðmundar sem vakið hafa athygli á samfélagsmiðlum.
Athugasemdir