Hjónin Eygló Björk Ólafsdóttir og Eymundur Magnússon, eigendur fyrirtækisins Móðir jörð í Vallanesi, hafa hlotið viðurkenningu atvinnuvegaráðherra fyrir framúrskarandi árangur í lífrænni framleiðslu. Viðurkenningin var afhent á degi lífrænna afurða þann 19. september síðastliðinn.
Móðir jörð á Fljótsdalshéraði hefur um árabil verið brautryðjandi í lífrænni ræktun og matvælaframleiðslu hér á landi. Býlið fékk formlega lífræna vottun árið 1995 en ræktun með þeim aðferðum á sér mun lengri sögu í Vallanesi.
Í dag er stunduð fjölbreytt ræktun á korni og grænmeti á bænum, auk þess sem þar fer fram fullvinnsla matvæla úr hráefni sem að stórum hluta er ræktað á staðnum. Þá hefur verið lögð mikil áhersla á skógrækt, skjólbelti og að auka notkun á íslensku byggi til manneldis með þróun næringarríkra vara og rétta.
Áhrif langt út fyrir eigin starfsemi
Í rökstuðningi kemur fram að árangur þeirra Eyglóar og Eymundar verði ekki aðeins mældur í uppbyggingunni í Vallanesi. Þau hafi rutt brautina í nýtingu staðbundinna auðlinda og miðlað dýrmætri þekkingu sem stuðlað hefur að auknum skilningi á möguleikum lífrænnar ræktunar á Íslandi.
Atvinnuvegaráðuneytið óskaði eftir tilnefningum til verðlaunanna, en til greina komu aðilar sem þykja hafa skarað fram úr á sviði framleiðslu, nýsköpunar, vöruþróunar, markaðssetningar, sölu eða kynningar á lífrænum vörum. Afhending viðurkenningarinnar er liður í aðgerðaáætlun stjórnvalda til að efla lífræna framleiðslu.
Eymundur tók við viðurkenningunni fyrir hönd þeirra hjóna úr hendi Bjarka Pjeturssonar, sérfræðings á skrifstofu landgæða og velferð dýra í atvinnuvegaráðuneytinu.
Athugasemdir