Besta leiðin til að panta kaffið þitt ef þú vilt huga að heilsunni

Kaffi spilar stórt hlut­verk í dag­legu lífi margra, en skoð­anir á heilsu­bótum þess eru skiptar. Sumir ótt­ast að kaffi hækki streitu­hormón og raski svefni, á meðan aðrir fagna ríku­legu magni andox­un­ar­efna. Samkvæmt Laure Hyvernat, nær­ing­ar­fræð­ingi og hómópata snýst málið sjaldn­ast um kaffið sjálft, heldur hvernig og hvenær við drekkum það.

„Kaffi getur verið öfl­ugt fyrir brennsl­una ef það er valið af skyn­semi, drukkið í réttu magni og á réttum tíma dags,“ segir Hyvernat í sam­tali við tíma­ritið Vogue. Hún dregur hér upp hag­nýta leið­bein­ingu um hvernig megi hámarka heilsu­bætur kaff­is­ins.

Svart espresso er best fyrir magann

Fyrir þá sem vilja drekka kaffið sitt á sem hollastan hátt eru frétt­irnar ein­faldar: Svart kaffi án syk­urs og mjólkur, eins og espresso eða ristretto, er besti kost­ur­inn. Slíkt kaffi er afar ríkt af fjöl­fen­ólum (andox­un­ar­efnum). Þar sem vökva­magnið er lítið veldur það síður ert­ingu hjá þeim sem eru með við­kvæman maga eða ristil.

Skyndikaffi og koffínlaust kaffi neðst á listanum

Hyvernat varar sér­stak­lega við skyndi­kaffi (instant kaffi). Það er mikið brennt, sem eykur myndun efn­is­ins akrýlamíðs, en eyði­leggur jafn­framt hollu andox­un­ar­efnin. „Við missum alla kost­ina en sitjum eftir með örvandi og ávana­bind­andi ókosti kaff­is­ins,“ segir hún.

Þá getur koff­ín­laust kaffi einnig reynst óhollt, þar sem fram­leið­endur nota oft kemísk efni við eyð­ing­una sem skilja eftir sig leifar. Hún mælir fremur með koff­ín­lausu kaffi sem unnið er með svo­kall­aðri Swiss Water aðferð.

Mestu „syk­ur­slysin“ eru þó bragð­bættir kaffi­drykkir, eins og dæmi­gerðir haust­drykkir með sírópi. Þeir ýta upp blóð­sykrinum og skilja fólk eftir algjör­lega orku­laust þegar líður á dag­inn.

Varar við kaffi með mjólk

Margir eiga erfitt með að sleppa mjólk­inni, en Hyvernat bendir á að sam­bland koff­íns og laktósa (mjólk­ur­syk­urs) geti verið mjög þungt fyrir lifr­ina og rænt lík­amann orku.

Hún leggur ríka áherslu á að fólk sem glímir við insúl­ín­við­nám, horm­óna­tengdar bólur eða aðra horm­óna­sjúk­dóma (eins og PCOS og endó­metríósu) ætti alfarið að sleppa mjólk­ur­kaffi. Fyrir heil­brigða ein­stak­linga sem ómögu­lega geta sleppt mjólk­inni mælir hún með hágæða, líf­rænni nýmjólk frekar en létt­mjólk.