Nýr framkvæmdastjóri Matvælaáætlunar Sameinuðu þjóðanna (WFP) kallar eftir því að átökunum í Súdan verði hætt, en þar standa hundruð þúsunda manna frammi fyrir hungursneyð.
Luke J. Lindberg hvatti til þess að stríðinu yrði hætt og kallaði eftir auknum fjárframlögum til WFP svo stofnunin geti aukið mannúðaraðstoð sína. Hann lét þessi orð falla í heimsókn sinni í Goz Al-Salam-flóttamannabúðirnar, þar sem fólk sem hefur hrakist frá heimilum sínum dvelur.
Í yfirlýsingu WFP kemur fram að stofnunin hafi veitt fjórum milljónum manna í Súdan mataraðstoð í ágúst. Fjárskortur hafi hins vegar neytt hana til að draga úr aðstoðinni og um 900 þúsund manns hafi þar með misst aðgang að henni.
WFP leitar nú eftir 520 milljónum Bandaríkjadala í framlög til að geta tryggt 5,4 milljónum manna mataraðstoð fram í apríl 2027.
Stríðið í Súdan hófst í apríl 2023 eftir að spenna milli hersins og hersveita Rapid Support Forces (RSF) braust út í átök í höfuðborginni Khartoum. Átökin breiddust síðar út um landið.
Samkvæmt Sameinuðu þjóðunum hefur stríðið skapað stærstu mannúðarkreppu heims. Um 34 milljónir manna, eða nærri tveir af hverjum þremur íbúum landsins, þurfa á mannúðaraðstoð að halda.
Banvænar drónaárásir hafa verið gerðar víða um Súdan af báðum stríðandi fylkingum.
Sameinuðu þjóðirnar hafa lýst yfir áhyggjum af notkun dróna í átökunum og segja árásirnar hafa kostað óbreytta borgara lífið, þar á meðal börn. Þær hafi jafnframt raskað mikilvægri grunnþjónustu.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir