Gunnar Smári Egilsson, fjölmiðlamaður á Samstöðinni, lýsir erfiðum veikindum, langvarandi verkjum og svefnleysi í færslu á Facebook. Hann gagnrýnir jafnframt langa biðlista í íslenska heilbrigðiskerfinu og segir tafir á meðferð hafa alvarleg áhrif á lífsgæði sjúklinga.
Gunnar Smári segist glíma við miklar þrengingar í mænugangi vegna breytinga í hrygg. Það hafi tekið um þrjá og hálfan mánuð að fá greiningu eftir ítrekaða bið eftir læknisviðtölum, myndatökum og niðurstöðum.
Hann kveðst hafa farið þrisvar í svæfingu frá páskum og að ástand hans hafi versnað eftir hverja aðgerð. Nú sé hann með verki í mjöðm og læri, eigi erfitt með gang og sofi aðeins um fimm klukkustundir á nóttu, oft í nokkrum lotum.
„Ég ætti að vera í endurheimt eftir hjartabilun en get lítið hreyft mig, geng við hækju út á stoppistöð til að komast í vinnu,“ skrifar Gunnar Smári.
Hann bíður nú eftir sterasprautum sem gætu tímabundið linað verkina. Þá segist hann vera á sex til tólf mánaða biðlista eftir meðferð á bakdeildinni í Stykkishólmi.
Gunnar Smári gagnrýnir harðlega forgangsröðun stjórnvalda og telur niðurskurð í heilbrigðiskerfinu bitna verst á þeim sem þurfa mest á þjónustunni að halda. Hann segir langa bið eftir meðferð geta leitt til þess að fólk missi starfsgetu.
Þrátt fyrir erfiðleikana segist hann reyna að nýta andvökunæturnar til ljóðaþýðinga og vonast til að þær veiti öðrum huggun.
„Það er hluti mennskunnar að gangast við að við þurfum huggun. Ef við berum okkur öll of vel sköpum við kaldan heim.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir