Safnið Pompidou-Metz í austurhluta Frakklands hefur lagt fram kæru til lögreglu eftir að banana, sem er hluti af umdeildu listaverki ítalska myndlistarmannsins Maurizio Cattelan, var stolið úr safninu um helgina.

Verkið, sem nefnist „Comedian“, samanstendur af banana sem festur er á vegg með silfurlímbandi. Öryggisvörður varð var við það á laugardag að ávöxturinn væri horfinn. Í tilkynningu frá safninu kemur fram að nýr banani hafi þegar verið settur í stað þess sem stolið var.

Þetta er ekki í fyrsta sinn sem verkið vekur athygli vegna slíks atviks. Banananum er reglulega skipt út á þriggja daga fresti. Í júlí á síðasta ári borðaði safngestur bananann fyrir framan viðstadda, en þá var ekki lögð fram kæra þar sem hægt var að ræða við viðkomandi.

Að þessu sinni segir safnið hins vegar að ekki sé vitað hver tók bananann og því hafi verið ákveðið að kæra þjófnaðinn. Þá sé einnig um að ræða ítrekað brot gegn verkinu og virðingarleysi gagnvart listinni.

„Comedian“ vakti heimsathygli þegar það var fyrst sýnt á Art Basel sýningunni í Miami árið 2019 með verðmiðann 120 þúsund dollara. Verkið hefur síðan hækkað mjög í verði og seldist ein útgáfa þess fyrir 5,2 milljónir dollara árið 2024.