Fangi sem var einn af tveimur sem sleppt var fyrir mistök úr fangelsi í Bretlandi í síðustu viku, gaf sig fram til yfirvalda í dag, samkvæmt lögreglu.
Lögreglan hóf leit á miðvikudag eftir að í ljós kom að Billy Smith, 35 ára, og annar fangi, hinn 24 ára gamli Alsírbúi Brahim Kaddour Cherif, hefðu verið látnir lausir fyrir mistök.
Smith gaf sig fram í Wandsworth-fangelsinu í Lundúnum þremur dögum eftir að honum var ranglega sleppt, að því er lögreglan í Surrey, suður af Lundúnum, greindi frá.
Alex Davies-Jones, aðstoðarráðherra í dómsmálaráðuneytinu, sagði að fangelsisstjórar hefðu verið boðaðir á fund vegna fjölda mistaka innan fangelsiskerfisins.
Lögreglan leitar enn að Cherif, sem var látinn laus úr sama fangelsi þann 29. október og er enn á flótta.
Málin eru mikil skömm fyrir ríkisstjórn Keirs Starmer, forsætisráðherra Bretlands og leiðtoga Verkamannaflokksins, sem nú glímir við mikla óvinsældir meðal almennings samkvæmt skoðanakönnunum.
Aðeins í síðasta mánuði var Hadush Kebatu, hælisleitanda frá Eþíópíu sem hafði verið dæmdur fyrir kynferðislega árás á unglingsstúlku og konu, einnig látinn laus fyrir mistök. Hann var handtekinn aftur eftir 48 klukkustunda leit.
Bresk stjórnvöld ákváðu síðar að vísa Kebatu úr landi með valdi og greiddu honum 500 pund (um 66 þúsund krónur) fyrir að yfirgefa landið. Jafnframt var hafin sjálfstæð rannsókn á mistökunum.
Tölur sýna að 262 fangar hafi verið látnir lausir fyrir mistök frá mars 2024 til mars 2025, samanborið við 115 fangalosanir á 21 mánaða tímabili þar á undan.
Handtaka Kebatu fyrr á árinu í Epping, norðaustur af Lundúnum, leiddi til margra vikna mótmæla fyrir utan hótel þar sem talið var að hælisleitendur væru hýstir.
Starmer, sem tók við embætti í júlí 2024, stendur nú frammi fyrir harðri gagnrýni vegna innflytjendamála, á sama tíma og hægri flokkurinn Reform UK, undir forystu hins umdeilda Nigel Farage, nýtur aukinna vinsælda.
