Þríburasysturnar Henrietta og Eliza Huszti, 32 ára, sáust síðast 7. janúar áður en lík þeirra fundust í ánni Dee nokkrum vikum síðar 31. janúar. Dánarorsök þeirra hefur verið staðfest sem drukknun og segir lögregla að dauðsföllin séu ekki talin grunsamleg.
Sjá einnig: Tvær þríburasystur hurfu sporlaust í Skotlandi – Lík fannst í á nærri staðnum sem þær sáust síðast
Henrietta, kaffibarþjónn og Eliza, sem starfaði við herbergisþrif á hóteli, hurfu í síðasta mánuði, en lögreglan í Skotlandi hóf gríðarstóra leit og notaði sérfræðiaðstoð lögreglu, bæði ríkis og staðbundinnar, þar á meðal leitarhunda, sjó- og köfunareiningar og flugaðstoð, til að reyna að hafa uppi á þeim.
Síðasta þekkta augnablik þeirra var 7. janúar á Viktoríubrúnni en þær beygðu til hægri inn á göngustíg við hliðina á ánni. Systurnar, sem voru hluti af þríburum frá Ungverjalandi, höfðu farið á sömu brú daginn fyrir hvarf þeirra. Sama dag höfðu þau sent leigusala sínum smáskilaboð og sagt að þær myndu flytja úr íbúðinni sinni, ákvörðun sem þau höfðu ekki deilt með ættingjum.
Fyrra líkið fannst 31. janúar við Queen Elizabeth Bridge, um hálfa mílu frá Viktoríubrúnni, þar sem seinna líkið fannst síðar um kvöldið. Systir þeirra, Edit Huszti, sagðist hafa talað við þær báðar á gamlárskvöld. Hún sagði að þær hafi virst glaðar og kátar meðan á samtalinu stóð. Það reyndist í síðasta skiptið sem þær töluðu saman.
Bróðir þeirra, Jozsef Huszti, sagði við BBC News að móðir þeirra hafi talað við dætur sínar í 40 mínútna samtali fjórum dögum áður en þær hurfu. Hann sagði að ekkert hafi virst óvenjulegt.
Eliza og Henrietta eru sagðar hafa verið afar nánar, gert flest saman og safnað saman til að kaupa sitt eigið húsnæði. Konurnar komu til Bretlands fyrir sex árum og höfðu starfað í Aberdeen síðan þá. Fjölskyldan segir að Henrietta hafi unnið í útibúi Costa í borginni.
Að vera úti á götu snemma morguns var óvenjuleg hegðun fyrir þær, að mati fjölskyldu þeirra. Lögreglan segir að húsráðandi þríburanna hafi fengið skilaboð um klukkan 02:12 um að þær myndu ekki snúa aftur í íbúðina sína, sem varð til þess að hún hringdi á lögregluna. Hún fann eigur systranna í íbúð þeirra, þar sem aðeins einn farsími þeirra var tekinn með sér. Slökkt var á þeim farsíma eftir að haft var samband við leigusalann.
Degi fyrir hvarf þeirra, klukkan 14:50 mánudaginn 6. janúar, sáust systurnar á öryggismyndavélum við Viktoríubrúna með bakpoka. Síðar sást til þeirra ganga til baka í átt að íbúð þeirra á Charlotte Street. Snemma á þriðjudagsmorgun, sáust þær aftur á öryggismyndavél við brúna. Í þetta skiptið eyddu þær fimm mínútum á göngubrautinni á brúnni en áttu ekki samskipti við aðra áður en þær virtust hverfa.
„Við botnum ekkert í þessu,“ sagði bróðirinn Jozsef við BBC. „Að þær hafi skrifað leigusala sínum skilaboð, að þær vildu segja upp leigusamningi sínum strax. Við höfðum engar upplýsingar um það. Svo það er það undarlega að stelpurnar hafi ekki sagt okkur neitt um það.“
Ef einstaklingar glíma við sjálfsvígshugsanir er bent er á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
