Einstakt einbýlishús á einni hæð við Grundarland 16 í Fossvogi hefur verið sett á sölu á 220 milljónir króna.
Um er að ræða rúmgóða og mikið endurnýjaða eign á afar eftirsóttum stað neðarlega í Fossvogi, þar sem gróin og vel hirt lóð setur sterkan svip á umhverfið.
Samkvæmt upplýsingum úr fasteignaskrá er húsið skráð 165,7 fermetrar að stærð auk 31,2 fermetra bílskúrs. Þá hefur verið byggð um 21 fermetra upphituð sólstofuviðbygging sem ekki er skráð hjá Fasteignamati ríkisins. Heildarstærð eignarinnar er því tæplega 218 fermetrar.
Húsið var byggt árið 1972 en gekkst undir umfangsmiklar endurbætur á árunum 2011 til 2013. Eignin skiptist í anddyri, hol, eldhús, borðstofu, stofu, sólskála, gestasalerni, baðherbergi, hjónaherbergi, svefnherbergi eða sjónvarpsherbergi, skrifstofuherbergi, þvottahús og bílskúr.
Sérstaklega er vakin athygli á staðsetningu eignarinnar, sem telst ein sú eftirsóttasta í Fossvogi. Þá liggur einnig fyrir að möguleiki sé á frekari stækkun samkvæmt upplýsingum frá Reykjavíkurborg.
Eignin sameinar rúmgóðan húsakost, vandaðar endurbætur og afar fallegt umhverfi, sem gerir hana að áhugaverðum kosti fyrir þá sem leita að fjölskylduhúsi á rólegum og grónum stað í Reykjavík.
