Joshua Charow eyddi fimm árum í að hringja á þúsundir dyrabjallna til að skrásetja líf yfir 85 listamanna á einhverjum sérstæðustu vinnustofum New York-borgar, fyrir nýju ljósmyndabókina sína, Artist in Residence.
Charow er fæddur 1998 og er bandarískur skjala-ljósmyndari og kvikmyndagerðarmaður með aðsetur í New York. Hann er þekktastur fyrir að rannsaka og fanga faldar hliðar, neðanjarðarmenningu og líf listamanna í New York-borg í gegnum bókverk sín og vinsæl myndbönd á samfélagsmiðlum.
Fyrsta ljósmyndabók hans sem kom út árið 2024, Loft Law: The Last of New York City's Original Artist Lofts, vakti mikla athygli. Í henni skjalfestir hann líf og vinnustofur yfir 50 listamanna sem búa enn í New York undir verndarvæng svokallaðra „Loft-laga“ frá 1982.
Nýjasta ljósmyndabók hans Artist in Residence sem kom út á árinu dýpkar enn frekar innsýnina í einstök vinnurými New York-listamanna með yfir 150 ljósmyndum.
Charow nýtur mikilla vinsælda á Instagram og YouTube. Stuttu heimildarmyndböndin hans um þennan sérstaka lífsstíl listamanna í New York hafa fengið yfir 100 milljónir áhorfa.
Í myndbandi sem hann lætur fylgja með bókinni fær maður innsýn inn í ótrúlegan heim listamanna sem búa í Loft-íbúðunum sem margir þeirra þurftu að berjast fyrir að fá að vera í.
