Skipuleggjendur Global Sumud Flotilla, hjálparbátaflota á leið til Gaza með hjálpargögn um borð, segjast hafa orðið vitni að sprengingum og fjölmörgum árásum með drónum á meðan skipin voru stödd við Grikkland frá því seint í gæt til morguns.
„Fjölmargir drónar, óþekktir hlutir látnir falla, samskipti trufluð og sprengingar heyrðust frá nokkrum bátum,“ sagði bátaflotinn í yfirlýsingu en ekki er talið að mannfall hafi orðið.
„Við erum að upplifa þessar sálfræðilegu aðgerðir beint, hér og nú, en við látum ekki hræða okkur.“
Brasílíski aðgerðarsinninn Tiago Avila greindi frá því á Instagram rétt eftir miðnætti í dag, klæddur björgunarvesti, að samtals tíu árásir hefðu beinst að mörgum bátum með sprengiflautum, sprengjublysum og úðun efna sem grunur leikur á að hafi verið eiturefni.
Bandaríski aðgerðasinninn Greg Stoker sagði að bátur hans undan strönd Krítar hefði einnig orðið fyrir árás:
„Báturinn okkar var heimsóttur af fjórskauta dróna sem sleppti litlum hvelli á þilfarið. Nokkrir aðrir bátar upplifðu það sama. VHF-sjósímakerfið okkar var tekið yfir af andstæðingum sem byrjuðu að spila Abba,“ sagði hann á Instagram.
Ísraelsk yfirvöld hafa ekki gefið út neina opinbera athugasemd um meintar drónaárásir, sprengingar eða truflun á samskiptum flotans.
Fyrr í gær sagði utanríkisráðuneyti Ísraels á X að seglskip flotans væru „að fylgja ofbeldisfullri leið“, sem sýndi „óeinlægnina í erindi flotans og að markmið hans væri að þjóna Hamas fremur en íbúum Gaza“.
Ráðuneytið hvatti skipin til að afhenda hjálpargögnin Ísraelum svo hægt yrði að koma þeim til Gaza „með samræmdum og friðsamlegum hætti“ í gegnum höfnina í Ashkelon. Skipuleggjendur flotans höfnuðu því alfarið.
„Ef flotinn heldur áfram að hafna friðsamlegu tilboði Ísraels mun Ísrael grípa til nauðsynlegra aðgerða til að hindra för hans inn á átakasvæðið og stöðva brot á lögmætum sjóhernaði, en þó gera allt sem í valdi þess stendur til að tryggja öryggi farþega,“ sagði í yfirlýsingu Ísraels.
Avila kallaði þetta „blekkingu frá síonistastjórninni“
„Við getum aldrei treyst hernámsafli sem fremur þjóðarmorð til að afhenda hjálp, það er ekki í þeirra þágu,“ sagði hann á Instagram.
Flotinn, sem telur 51 bát, lagði upp frá vesturhluta Miðjarðarhafs fyrr í mánuðinum með það markmið að rjúfa hafnbann Ísraels á Gaza og koma hjálpargögnum til svæðisins. Áður hafði hann orðið fyrir tveimur grunuðum drónaárásum í Túnis, þar sem bátarnir lágu við akkeri, áður en siglingin hófst á ný til Gaza.
Umhverfisaðgerðasinninn Greta Thunberg er meðal þekktari þátttakenda í flotillanum.
Alþjóðlegir aðgerðasinnar, þar á meðal hjálparstarfsmenn og baráttufólk, segja að flotinn sé friðsamleg aðgerð sem miði að því að vekja athygli heimsins á mannúðarkreppunni á Gaza.
Ísrael hefur stöðvað tvær fyrri tilraunir aðgerðarsinna til að komast sjóleiðina til Gaza á þessu ári, í júní og júlí.
Hægt er að fylgjast með staðsetningu flotans hér.
