Elísabet S. Guðmundsdóttir hefur verið dæmd í 30 daga skilorðsbundið fangelsi fyrir brot gegn valdstjórninni eftir að hafa hrækt á lögreglumann við skyldustörf í Reykjavík í desember árið 2024.

Samkvæmt ákæru átti atvikið sér stað við heimili í Reykjavík þar sem Elísabet átti í samskiptum við lögreglu. Upphaflega var henni einnig gefið að sök að hafa lokað útidyrahurð á fingur lögreglumanns með þeim afleiðingum að hann hlaut mar á fingri. Sá liður var hins vegar felldur niður.

Eftir breytingu ákærunnar játaði konan sök skýlaust og viðurkenndi að hafa hrækt á lögreglumanninn þannig að hann fékk hráka á kinn. Málið var því tekið til dóms án frekari sönnunarfærslu samkvæmt ákvæðum laga um meðferð sakamála.

Við ákvörðun refsingar leit dómurinn meðal annars til þess að konan hafði áður verið dæmd fyrir sambærilegt brot gegn valdstjórninni árið 2021. Þá var einnig tekið mið af því að hún játaði brotið og lýsti yfir iðrun.

Refsing hennar var ákveðin 30 daga fangelsi en fullnustu refsingarinnar var frestað og fellur hún niður að tveimur árum liðnum haldi hún almennt skilorð á þeim tíma.

Konunni var jafnframt gert að greiða rúmlega 424 þúsund krónur í málsvarnarlaun skipaðs verjanda síns auk tæplega 51 þúsund króna í annan sakarkostnað.