Heimsókn Iliess Pays til hins þekkta ferðamannastaðar Nyhavn í Kaupmannahöfn endaði með líkamsárás eftir að tveir danskir menn réðust að honum og vinum hans með kynþáttafordómum og barsmíðum.
Iliess, sem er 29 ára og frá Strasbourg, var í Kaupmannahöfn síðastliðinn laugardag ásamt sænsku vinkonu sinni Hodan Hirsi, sem býr í Malmö, og frænda hennar Abdulrahman Hirsi.
Seint um kvöldið voru þau á leið til Nyhavn þegar tveir ölvaðir menn tóku eftir hópnum og byrjuðu að áreita þau. „Þetta er staður sem maður sér á póstkortum,“ segir Iliess í samtali við Aftonbladet.
Á leiðinni þangað komu tveir ölvaðir danskir menn auga á þremenningana og blóm sem stóð upp úr bakpoka Iliess Pays.
„Má ég fá rósina?“ kallaði annar mannanna.
Félagarnir reyndu að hunsa hina drukknu Dani en þeir fylgdu þeim eftir og reyndu að ögra þeim áður en þeir fóru að hrópa að þeim rasískum orðum.
Hodan Hirsi segir mennina meðal annars hafa notað niðrandi kynþáttahugtök á borð við n-orðið og hrópað rasísk ummæli.
Skömmu síðar voru Iliess og Abdulrahman slegnir aftan frá og féllu meðvitundarlausir til jarðar.
„Ég var sleginn aftan frá og eftir það man ég lítið,“ sagði Iliess.
Samkvæmt Hodan, sem varð ekki fyrir árásinni sjálfri, stigu mennirnir á höfuð Abdulrahman og börðu og spörkuðu í Iliess meðan hann lá á jörðinni. Á meðan héldu þeir áfram að hrópa rasísk ummæli.
Eftir árásina voru mennirnir fluttir á sjúkrahús í Kaupmannahöfn. Abdulrahman slasaðist alvarlegast, nefbrotnaði og var mjög bólginn í andliti.
Iliess segir árásina hafa haft mikil áhrif á sig bæði líkamlega og andlega.
„Ég er hreinskilnislega í áfalli,“ sagði hann og bætti við að hann ætti erfitt með að standa, sitja og sofa vegna verkja.
Hann starfar sem dansari og segir líkama sinn vera sitt helsta atvinnutæki.
Þau gagnrýna einnig viðbrögð lögreglunnar í Kaupmannahöfn og segja málið ekki hafa verið tekið nægilega alvarlega. Að sögn þeirra hafa þau enn ekki fengið frekari upplýsingar frá lögreglu eftir skýrslutöku.
Árásarmennirnir flúðu af vettvangi og óvíst er hvort þeir hafi verið handteknir.
„Ég vil ekki hefnd, en ég vil réttlæti,“ sagði Iliess.
Hodan Hirsi segir mikilvægt að málið gleymist ekki.
„Við megum ekki láta þetta fara fram hjá okkur,“ sagði hún.
