Fjórir karlar hafa verið úrskurðaðir í áframhaldandi fjögurra vikna gæsluvarðhald vegna rannsóknar lögreglu á umfangsmiklum innflutningi fíkniefna til landsins en þetta kemur fram í tilkynningu frá lögreglu.

Héraðsdómur Reykjavíkur féllst í gær á kröfu Lögreglunnar á höfuðborgarsvæðinu um að mennirnir sættu gæsluvarðhaldi til 28. október. Gæsluvarðhaldið er nú byggt á almannahagsmunum.

Málið snýr meðal annars að innflutningi á fimm kílóum af amfetamíni sem barst til landsins í hraðsendingu frá Þýskalandi.

Þrír mannanna voru handteknir í fyrri hluta september en sá fjórði um viku síðar. Allir voru þeir handteknir í Reykjavík og voru í kjölfarið úrskurðaðir í gæsluvarðhald á grundvelli rannsóknarhagsmuna.

Rannsókn lögreglu einskorðast þó ekki við umrædda amfetamínsendingu. Mennirnir eru jafnframt grunaðir um að hafa tekið á móti fleiri fíkniefnasendingum á undanförnum vikum og er sá þáttur málsins einnig til rannsóknar.

Við húsleitir í tengslum við málið lagði lögregla hald á fleiri fíkniefni sem talið er að tengist eldri sendingum. Þar á meðal fannst um eitt kíló af ketamíni.

Lögreglan vinnur nú að því að ljúka rannsókn málsins og er stefnt að því að þeirri vinnu verði lokið á næstunni. Að rannsókn lokinni verður málið sent til embættis héraðssaksóknara til frekari meðferðar.