Netanyahu hefur ákveðið að höfða meiðyrðamál gegn ísraelska fjömiðlinum Haaretz og fleiri fjölmiðlum vegna frétta um viðvaranir fyrir árás Hamas

Benjamin Netanyahu, forsætisráðherra Ísraels, höfðaði á þriðjudag meiðyrðamál gegn dagblaðinu Haaretz, öðrum fjölmiðlum og blaðamönnum vegna fréttar Shlomis Eldar og Ruth Yuval um að hann hefði fengið viðvörun áður en Hamas-samtökin gerðu árásina 7. október 2023.

Netanyahu höfðar einnig mál gegn blaðamönnunum Nadav Eyal, Uri Misgav, Barak Ravid og Attila Somfalvi, auk dagblaðsins Yedioth Aharonot og fréttamiðilsins Ynet.

Í stefnu Netanyahus er frétt Haaretz lýst sem „algjörri og augljósri lygi sem á sér enga stoð í raunveruleikanum“. Hann sakar hina fjölmiðlana og blaðamennina um að hafa magnað upp ásakanirnar, birt framhaldsfréttir um málið og sett fram ummæli sem hann telur meiðandi.

Netanyahu krefst 2,6 milljóna ísraelskra sikla, jafnvirði um 846 þúsund Bandaríkjadala, í skaðabætur frá þeim stefndu. Í stefnunni hafnar hann því að hafa fengið viðvaranir.

Í kærunni segir að „það verði að taka af allan vafa, með afdráttarlausum hætti, að enginn fundur og/eða samtal hafi átt sér stað milli forsætisráðherrans og forseta Sameinuðu arabísku furstadæmanna. Þá hafi heldur enginn fundur og/eða samtal átt sér stað milli forsætisráðherrans og Abbas Kamel, yfirmanns egypsku leyniþjónustunnar, á þeim tímum sem haldið er fram eða á nokkrum tíma frá september og fram til 7. október 2023. Þetta hrekur með öllu framangreindar rangfærslur.“

Málshöfðunin kemur í kjölfar þess að Netanyahu átti leynilegan fund með Mohamed bin Zayed, forseta Sameinuðu arabísku furstadæmanna, á sunnudag. Samkvæmt heimildarmanni sem þekkir til málsins bað Netanyahu forsetann um að hafna frétt Haaretz um að hann hefði varað við yfirvofandi árás Hamas skömmu fyrir 7. október 2023.

Netanyahu staðfesti að hann hefði farið í heimsóknina ásamt eiginkonu sinni en hafnaði frétt Associated Press um að hann hefði ætlað að biðja forsetann um að vísa frétt Haaretz á bug.

Utanríkisráðuneyti Sameinuðu arabísku furstadæmanna vildi ekki tjá sig um fréttir af fundinum en sagði að ríkið héldi „opnum og beinum samskiptaleiðum“ við Ísrael og miðlaði „öllum viðeigandi upplýsingum úr leyniþjónustu“.

Skrifstofa Netanyahus hafði ekki tjáð sig um málið þegar fréttin var birt.

Viðvaranir til Netanyahus fyrir 7. október

- Viðvörun frá Sameinuðu arabísku furstadæmunum:

Haaretz greindi fyrst frá málinu og The New York Times staðfesti síðar fréttina. Mohamed bin Zayed, forseti Sameinuðu arabísku furstadæmanna, varaði Netanyahu við um tíu dögum fyrir 7. október og sagði Hamas-samtökin undirbúa umfangsmikla árás. Hann hvatti forsætisráðherrann til að taka viðvörunina alvarlega.

- Fyrsta viðvörun Egypta:

The Atlantic greindi fyrst frá því að Abbas Kamel, yfirmaður egypsku leyniþjónustunnar, hefði farið í leynilega heimsókn til Ísraels 26. september 2023. Þar varaði hann við því að Hamas virtist undirbúa stórfellda árás.

- Frekari viðvaranir frá Egyptum:

Yedioth Aharonoth og The Wall Street Journal greindu frá því að Kamel hefði hringt í Netanyahu nokkrum dögum fyrir 7. október og varað hann við vísbendingum um yfirvofandi árás frá Gaza.

Tveir heimildarmenn, þar á meðal einstaklingur sem ræddi beint við bin Zayed, staðfestu fréttina við The New York Times á föstudag.

Samkvæmt The New York Times sýnir afrit af fundi sem Netanyahu boðaði til með háttsettum öryggisfulltrúum Ísraels 1. október 2023 að hann hafi sagt þeim að allar hernaðaraðgerðir Ísraels á Gaza gætu dregið úr líkum á því að Sádi-Arabía tæki upp stjórnmálasamband við Ísrael. Netanyahu taldi að samkomulag um slíkt samband væri þá skammt undan.

Á föstudag greindi The Atlantic frá því að Kamel hefði komið til Ísraels 11 dögum fyrir árás Hamas 7. október og varað við því að vopnaðir hópar á Gaza væru að undirbúa stórfellda árás. Glugginn til að koma í veg fyrir hamfarir væri að lokast.

Í fréttinni, sem byggði á upplýsingum frá ísraelskum, egypskum, arabískum, bandarískum og evrópskum embættismönnum sem fengið höfðu upplýsingar um heimsóknina, kom fram að Kamel hefði mælt með því að Ísraelar veittu Hamas efnahagslegar tilslakanir til að koma í veg fyrir átök.

Samkvæmt fréttinni varaði Kamel við því að ef Ísrael breytti ekki stefnu sinni myndi „Gaza springa framan í ykkur“. Þessi orð hafði fyrrverandi ísraelskur embættismaður eftir Kamel eftir að hafa fengið upplýsingar um heimsóknina.

The Wall Street Journal greindi frá því á mánudag að Kamel hefði hringt í Netanyahu nokkrum dögum fyrir árás Hamas 7. október 2023 og varað hann við vísbendingum um yfirvofandi árás frá Gaza. Samkvæmt embættismönnum í arabísku ríki höfðu tvær fyrri viðvaranir frá Egyptum ekki verið teknar til greina.

Standa við skrif sín

Ákvörðun Netanyahus um að höfða mál kemur í kjölfar þess að hann sendi Haaretz og blaðamönnunum Eldar og Yuval aðvörunarbréf fyrr í þessum mánuði vegna fyrirhugaðrar meiðyrðamálshöfðunar. Haaretz svaraði bréfinu með því að lýsa yfir fullum stuðningi við fréttaflutning sinn.

Í opinberri yfirlýsingu vegna hótana Netanyahus um málshöfðun sagði Haaretz að blaðið „láti ekki þagga niður í sér vegna tilrauna forsætisráðherrans til að stöðva gagnrýna blaðamennsku – og muni ekki hika við að leiða sannleikann í ljós fyrir dómstólum“.