Frænka leikarans Leslie Nielsen heitins, Kyoko, þekkt á TikTok sem @kyokoandrudy, hefur nýlega deilt sögu af útför hans sem sýnir að hinn goðsagnakenndi húmor hans virðist hafa lifað hann sjálfan en Leslie lést í nóvember 2010.
Kyoko segir að sagan sé ein af hennar „uppáhalds“ um föðurbróðurinn, þó hún hafi lengi hikað við að segja hana opinberlega þar sem hún gerðist í jarðarför. En þar sem ást hans á prumphljóðatækjum er nú almennt þekkt taldi hún tímabært að, eins og hún orðaði það, að „sleppa þessu út í andrúmsloftið“.
Lokabrandari Naked Gun-leikarans Nielsens gekk svona fyrir sig: Prumphljóðatæki var falið í kistunni hans. Fjarstýringin sem stjórnaði hátalaranum við kistuna lá síðan á borði við opna barinn, já, jarðarförin var með opnum bar og Kyoko lýsir henni fremur sem „stórri veislu“ með brúðkaupsblæ en hefðbundinni kveðjustund. Gestir sem sóttu sér drykk gátu ýtt á takkann og sent prumphljóð yfir salinn, öðrum gestum til undrunar.
„Fyrir þá sem stóðu þar í sorg og vissu ekki hvað var í gangi, hefði auðveldlega mátt halda að hljóðið kæmi frá líkama hans,“ sagði Kyoko. „Er það ekki bæði ótrúlega ósmekklegt og um leið ótrúlega fyndið?“
Ekki er fullkomlega ljóst hvort hugmyndin hafi upprunalega verið hans sjálfs eða ekkju hans, en Kyoko segir að brandarinn hafi fullkomlega heiðrað bæði húmor Nielsens og þá arfleifð sem hann skildi eftir sig.
@kyokoandrudy A day and a dinner I’ll never forget #leslienielsen #actor #comedy #hollywood #storytime ♬ original sound - Kyoko
Aðdáendur hrósuðu brandaranum í kjölfar játningar frænku Nielsens.
„Þetta er það Leslie Nielsen-legasta sem ég hef nokkurn tíma heyrt. Algjör snillingur 💙“
„Hann gaf orðinu RIP alveg nýja merkingu.“
Nielsen var sem sagt kunnur fyrir prumpuhúmor. Á legsteininum hans stendur: „Let ’er rip.“
„Guð, þessi maður var gimsteinn. Við þyrftum meira af svona gleði og húmor í dag,“ skrifaði enn einn aðdáandinn.
Margir deildu einnig eigin uppákomum með Nielsen og prumphljóðavélinni hans.
„Pabbi minn (látinn) vann við lýsingu í nokkrum myndum sem hann lék í og sagði margar sögur af prumphljóðavélum.“
„Hitti hann í Toronto-flugvelli sem barn. Ég veifaði og hann kom til mín, en ég varð svo stressuð að ég fór að gráta – og þá ‘prumpaði’ hann og ég hló. Algjör hetja.“
Einn strætóbílstjóri sagðist hafa fengið innblástur frá Nielsen til að „hafa alltaf prumphljóðatæki í rútunni til að stríða krökkunum“.
Langlífur brandari Nielsens hófst með lófatæki sem vinur hans, Duffy Martin, bjó til. Nielsen bar það með sér hvar sem hann fór og notaði m.a. í viðtölum hjá Conan O’Brien og David Letterman.
Það er því ljóst að Nielsen skildi eftir sig arfleifð sem minnir heiminn á að taka lífið ekki of hátíðlega, nema þá helst að muna að hafa gaman.
