Uppskriftasmiðurinn og matgæðingurinn Hildur Ómarsdóttir og sambýlismaður hennar, Ragnar Gauti Hauksson, hafa sett í sölu fjögurra herbergja íbúð sína við Hraunbæ 102D í Reykjavík.

Um er að ræða 122,9 fermetra eign sem samanstendur af 101 fermetra íbúð á annarri hæð, 5,3 fermetra sérgeymslu og 16,6 fermetra bílskúr á jarðhæð. Ásett verð eignarinnar er 78,9 milljónir króna.

Íbúðin hefur verið mikið endurnýjuð á undanförnum árum og skiptist í hol, þrjú svefnherbergi, stofu, opið eldhús, baðherbergi og þvottahús. Þá fylgja eigninni yfirbyggðar suðursvalir, sérgeymsla í sameign og stæði í lokaðri bílageymslu. Sameiginleg vagna- og hjólageymsla er einnig í húsinu.

Húsið var byggt árið 1974 og stendur á vinsælum stað í Árbæjarhverfi. Stutt er í alla helstu þjónustu, þar á meðal verslanir, leikskóla, grunnskóla, sundlaug og íþróttaaðstöðu. Einnig eru fjölbreyttar göngu- og hjólaleiðir í næsta nágrenni og góðar almenningssamgöngur.

Næg bílastæði eru við húsið og nýlega hafa verið settar upp rafhleðslustöðvar fyrir íbúa og gesti. Samkvæmt sölulýsingu er um að ræða vel staðsetta fjölskyldueign sem hefur fengið gott viðhald og býður upp á fjölbreytta möguleika fyrir nýja eigendur.