Hjálmtýr Heiðdal, formaður félagsins Ísland – Palestína, segir að nýjustu fréttir Ísraelshers um meint vopnahlésbrot Hamas í Rafah séu byggðar á ósannindum.
„Fréttir Ísraelshers um vopnahlésbrot Hamas í Rafah eru lygi eins og við var að búast,“ skrifar Hjálmtýr í færslu á Facebook og bætir við að „atvikið hefur ekkert með Hamas að gera, og enga aðgerð af þeirra hálfu, eins og margir fjölmiðlar gefa í skyn.“
Hann vísar til ísraelska dagblaðsins Haaretz sem heimildar og segir að „það [sé] hópur landránsmanna, sem eiga einkafyrirtækið Uriah, sem stundar verktöku fyrir herinn við niðurrifi húsa. Þeir eru enn að rífa það sem eftir stendur af húsum í Rafah.“
Samkvæmt færslu Hjálmtýs sprakk sprengja undir jarðýtu sem fyrirtækið notaði við verkið. „Þegar jarðýta á þeirra vegum fór um svæðið keyrði tækið yfir virka sprengju sem sprakk undir ýtunni. Nokkrir landránsmenn særðust og hermenn sem fylgdu þeim. Talið er að að minnsta kosti átta hafi særst og tveir drepist, þótt yfirvöld hafi að venju haldið nákvæmum upplýsingum leyndum,“ skrifar hann.
Hjálmtýr bendir á að þrátt fyrir vopnahléið haldi Ísrael áfram að eyðileggja heimili á Gaza. „Það sem vekur sérstaka athygli við þessa frétt er að Ísraelsmenn eru, þrátt fyrir vopnahléð, enn að rústa húsum á Gaza. Þannig að það var Ísraelsher sem rauf raun vopnahléið með sprengjuárásum, ekki andspyrnan.“
Í lok færslunnar segir hann: „Ísraelsher hefur brotið vopnahléið mörgum sinnum og drepið a.m.k. 40 Palestínumenn.“
