Veitingastaðurinn Javier's í miðborg Los Angeles (DTLA), sem hannaður er af íslenska arkitektinum og hönnuðinum Gullu Jónsdóttur, heldur áfram að vinna til stórra alþjóðlegra verðlauna á þessu ári. Nýverið var tilkynnt að verkefnið hefði hlotið hin virtu heiðursverðlaun Award of Excellence á IES SoCal Illumination Awards 2026 fyrir framúrskarandi ljóshönnun.
Lýsingin lífræn og dularfull
Verðlaunin eru afhent af Samtökum ljóstækniverkfræðinga í Suður-Kaliforníu (IES SoCal) og fagna því besta sem gert er í lýsingu á mannvirkjum. Ljóshönnun staðarins var unnin í samstarfi við hönnunarstofuna Lighting Design Alliance, og þykir lýsingin fanga fullkomlega það lífræna og dularfulla andrúmsloft sem einkennir hönnunarstíl Gullu.
Þetta er annar stóri hönnunarsigur staðarins á skömmum tíma, en í janúar síðastliðnum hlaut Javier's DTLA einnig verðlaunin Best Hospitality Design Award á hinni virtu Créateurs Design Awards hátíð í París, sem haldin er í tengslum við Maison&Objet hönnunarvikuna.
Maison&Objet verðlaunin í París teljast til einna fremstu viðurkenninga sem hönnuðum og arkitektum hlotnast á alþjóðlegum vettvangi og staðfesta sterka stöðu Gullu á hönnunarmarkaðnum.
Eitt áhugaverðasta hönnunarverkefni á ferlinum
Gulla Jónsdóttir, sem rekur hönnunarstofuna Gulla Jónsdóttir Architecture & Design í Los Angeles, hefur starfað í Bandaríkjunum í um þrjá áratugi. Hún er þekkt fyrir ljóðræna og plássmettaða hönnun þar sem hvert einasta horn og rými er nýtt til hins ítrasta og dregur Gulla innblásturinn úr náttúrunni. Þessi röð alþjóðlegra viðurkenninga á árinu 2026 festir Javier's DTLA enn frekar í sessi sem eitt áhugaverðasta hönnunarverkefni hennar á ferlinum til þessa.
