David Adler, samhæfingaraðili Progressive International og einn þeirra sem sigla með Global Sumud Flotilla, bátaflotanum segir í yfirlýsingu á samfélagsmiðlinum X að hann óttist að hafa skrifað „sitt síðasta bréf“ þar sem flotinn nálgist strendur Gaza. Aðeins um 120 sjómílur eru nú eftir til lands.

„Í gærkvöldi sóttu nokkur ísraelsk herskip að flota okkar. Þau réðust að skipunum, hræddu áhöfnina og slökktu á samskiptakerfum okkar,“ skrifaði Adler. „Við þekkjum þessar aðferðir frá fyrri flotaverkefnum. Við vitum að þær eru undanfari þess sem við höfum lengi óttast: ólöglegar handtökur Ísraels á alþjóðlegu hafsvæði.“

Adler sagði að áhöfnin væri nú viðbúin slíkri árás: „Þegar þau stíga um borð í bátana okkar munum við ekki veita mótspyrnu. Við erum tilbúin. Með farsímum okkar og öryggismyndavélum munum við gera okkar besta til að skrásetja allt. Við munum miðla því til heimsins og treysta á að þið dreifið fréttunum af þessari glæpsamlegu árás.“

Hann lagði þó áherslu á að flotinn hefði þegar náð árangri: „Hann hefur vakið athygli heimsins á þjáningum Gazabúa, sameinað land og sjó í fjöldahreyfingu milljóna og þvingað ríki til að takast á við ólöglegt umsátur sem svipti Palestínumenn sjálfsákvörðunarrétti sínum.“

Á sama tíma hófst blaðamannafundur þar sem skipverjarnir Thiago Ávila og Lisi Proenca ræddu síðustu atburði. Með þeim tók einnig þátt Francesca Albanese, sérstakur skýrslugjafi Sameinuðu þjóðanna um hernumdu palestínsku svæðin.

Samkvæmt Ávila beittu ísraelsku herstjórnarmennirnir sálfræðihernaði gegn hluta flotans þegar þeir hringsóluðu um skipin í nótt. „Þeir slökktu á tækjunum okkar sem hafði áhrif á myndavélar, beina útsendingu og samskiptakerfi sem gerðu okkur kleift að senda skilaboð til heimsins,“ sagði hann. Að sögn Ávila lamaði þetta einnig siglingatæki. Skipið Alma, sem hann er um borð í, hefur orðið fyrir bæði rafrænum og vélrænum skemmdum og jafnframt hlotið skaða á yfirbyggingu, en heldur þó enn úti siglingu.

Lisi Proenca, þátttakandi um borð í Sirius, öðru skipi í flotanum, tók einnig til máls á blaðamannafundinum og lýsti því hvernig skip hennar varð fyrir aðgerðum ísraelska sjóhersins. Hún sagði:

„Eftir að ísraelska skipið yfirgaf Alma nálgaðist það Sirius og fór fyrir framan hana. Það kom ekki í beina snertingu en hringsólaði í kringum skipið um hríð. Ég áætla að það hafi verið í um það bil 15 mínútur.

Á þeim tíma voru samskipti skipsins trufluð, svipað og gerðist hjá Alma.

Fólkið um borð fann fyrir spennu og það vakti ótta meðal sumra áhafnarmeðlima.

Að lokum komu nokkrir áhafnarmeðlimir út og sýndu ísraelska sjóhernum að þeir væru óvopnaðir.“

Um 500 manns er um borð í hátt í 50 bátum flotans, þar á meðal hin sænska Greta Thunberg, hinn írski stórleikari Liam Cunningham og nú hin íslenska Magga Stína Blöndal.