Ungur maður sem heitir Jóhannes hefur verið dæmdur af Héraðsdómi Reykjavíkur í tveggja mánaða fangelsi.
Hann var ákærður fyrir umferðar-, lögreglu-, vopna- og fíkniefnalagabrot með því að hafa, mánudaginn 24. apríl 2023, ekið léttu bifhjóli, án skráningarmerkis, án þess að nota hlífðarhjálm, án gildra ökuréttinda og óhæfur til að stjórna því örugglega vegna áhrifa ávana- og fíkniefna og slævandi lyfja, of hratt miðað við umferðaraðstæður um Suðurlandsbraut í Reykjavík og á hjólastíg án þess að sinna fyrirmælum lögreglu um að stöðva akstur bifreiðarinnar sem gefin voru með forgangsljósum og hljóðmerki heldur ekið inn á göngustíg hjá Reykjavegi og á röngum vegarhelming um Sigtún og um ýmsar götur og göngustíga Reykjavíkur þar til hann stöðvaði loks á göngustíg við Kringlumýrarbraut, og í kjölfarið neitað að hlýða fyrirmælum lögreglu um að leggjast niður og reyndi að aka aftur af stað en lögreglumaður náði að stöðva för hans, og á sama tíma haft í vörslum sínum 0,28 grömm af kókaíni, 0,34 grömm af maríhúana, 142 stykki af Rivotril og 16 stykki af Quetiapin Actavis, og útdraganlega járnkylfu, sem lögregla fann við leit í tösku ákærða og farangursgeymslu bifhjólsins.
Þá var hann einnig ákærður fyrir að hafa haft mikinn fjölda mismunandi eiturlyfja á sér á öðrum dögum þegar hann átti í samskiptum við lögreglu.
Við meðferð málsins játaði Jóhannes brot sín skýlaust og greindi frá því að hann hefði leitast við að koma lífi sínu á réttan kjöl
Dómur Jóhannesar er skilorðsbundinn til tveggja ára og sætti hann upptöku á 31,84 grömmum af kókaíni, 44,03 grömmum af maríhúana, 142 stykkjum af Rivotril, 16 stykkjum af Quetiapin Actavis, 20,78 grömmum af amfetamíni, 7 millilítrum af kannabisblönduðum vökva, 7,74 grömmum af MDMA, 36 stykkjum MDMA, 0,93 grömmum af tóbaksblönduðu kannabisefni, níu stykkjum af Alprazolam Krka, 34 stykkjum af Contalgin, 11,61 grömmum af ketamín, 111 stykkjum af OxyContin, fjórum stykkjum af Pregabalin Krka, 25 stykkjum af Sobril, járnkylfu, tveimur vogum, Apple-farsíma, tveimur Nokia-farsímum og 63.000 krónum
