Í síðustu viku voru kynnt úrslit rektorskjörs Háskóla Íslands en kosið var milli Silju Báru Ómarsdóttur, prófessors við Stjórnmálafræðideild, og Magnúsar Karls Magnússonar, prófessors við Læknadeild. Silja Bára vann þá kosningu og hlaut 50,7% atkvæða en Magnús 47,6%. Í fyrri umferð hafði Magnús fengið 33,6% atkvæða en Silja Bára 29,3%.

Hafa sumir stuðningsmenn Silju Báru og Magnúsar eldað grátt silfur á göngum skólans undanfarnar vikur og er lítill kærleikur þar á milli þrátt fyrir að úrslitin hafi verið kynnt.

Hluti af stuðningsmönnum Silju Báru heldur því fram að kennarar skólans hafi hringt í nemendur og sagt þeim að kjósa Magnús en vægi nemenda í kjörinu var 30% á móti 70% hjá starfsfólki Háskóla Íslands. Í viðtali við Mannlíf sagði Magnús Karl að hann kannist ekki við að kennarar hafi hringt í eigin nemendur fyrir sína hönd. Þá sagði hann einnig að sér þætti óeðlilegt að hringja í eigin nemendur til að hvetja þá til að kjósa ákveðinn frambjóðanda.

Mannlíf hefur hins vegar heimildir fyrir því kennarar við læknadeild skólans hafi sagt við nemendur sína í kennslustundum að þeir ættu að kjósa Magnús Karl.

Þessar ásakanir hafa farið fyrir brjóstið á stuðningsmönnum Magnúsar og skrifaði Jón Ólafsson, prófessor í menningarfræði og Sovétsögu, harðorða færslu á samfélagsmiðla um málið. Undir hana tóku nokkrir starfsmenn HÍ.

Annað sem hluti stuðningsmanna Silju Báru voru ósáttir við í kosningabaráttunni var framkoma Jóns Gnarr, þingmanns Viðreisnar, en hann lýsti yfir stuðningi sínum við Magnús Karl og kom fram í myndböndum á samfélagsmiðlum með Magnúsi.

Þykir þeim Jón hafa sýnt dómgreindarleysi í hlutverki sínu sem alþingismaður og mögulega brotið siðareglur Alþingis. Vísa þeir sérstaklega í meginreglur um hátterni þar sem stendur að þingmenn eigi ekki nýta opinbera stöðu sína til persónulegs ávinnings fyrir sig eða aðra. Þykir þeim persónulegur ávinningur Magnúsar í þessu tilfelli verulegur og þá skapi það hagsmunaárekstur að einstaklingur tekur sem beinan þátt í löggjöf um Háskóla Íslands skuli lýsa yfir stuðningi við einstakan frambjóðanda og taka þátt í framboði hans.

Jón Gnarr er hins vegar ósammála þessu. „Ég lít alls ekki svo á að ég hafi verið að beita, hvað þá misbeita, stöðu minni sérstaklega til hagsbóta neinum manni. Það eina sem ég gerði var að skrifa litla meðmælagrein fyrir vin minn, þar sem ég lýsti mínum persónulegu kynnum af honum. Auk þess gerðum við saman stutt efni fyrir samfélagsmiðla. Ég lék ekki í auglýsingu, fékk ekki neitt greitt né vilyrði um nokkuð annað. Að öðru leiti hef ég litlu við þetta mál að bæta,“ sagði þingmaðurinn í skriflegu svari til Mannlífs.

Þorgerður Katrín Gunnarsdóttir, formaður Viðreisnar og utanríkisráðherra, svaraði ekki ítrekuðum fyrirspurnum Mannlífs um hennar álit á málinu.