Lögreglan í Suðvestur-Finnlandi hefur lokið frumrannsókn á röð kynferðisbrota í Turku (Ábær á íslensku) þar sem 21 árs karlmaður er grunaður um að hafa framið sex brot.

Konurnar sem urðu fyrir árásunum voru valdar af handahófi og voru á aldrinum um 20 til 50 ára, að sögn lögreglu.

Brotin áttu sér stað í Turku á tímabilinu frá desember til ágúst.

Málið snýr meðal annars að nauðgun, tveimur tilraunum til nauðgunar, tveimur kynferðisárásum og kynferðislegri áreitni.

Lögreglan greindi frá því í dag að frumrannsókn málsins væri lokið. Maðurinn sem grunaður er um brotin situr enn í gæsluvarðhaldi.