Eiríkur Rögnvaldsson, uppgjafaprófessor í íslenskri málfræði, hefur fengið ýmsar hugmyndir að nýjum götunöfnum í Reykjavík á morgungöngum sínum með eiginkonu sinni.

Eiríkur segir í spaugilegri Facebook-færslu að hann fái „ýmsar góðar hugmyndir að vannýttum götunöfnum í stíl við nöfn sem fyrir eru“.

Í Rauða hverfinu í Holtunum telur hann til að mynda að mætti bæta við götunum Meinhollti, Óhollti og jafnvel Þjóðhollti.

„Háteigskirkja gæti staðið við Drottinhollt,“ skrifar Eiríkur og bætir við að hann viti vel að „hin holtin eru bara með einu l-i en framburðurinn er eins“.

Eiríkur sér einnig ýmsa möguleika í kringum Hrefnugötu.

„Í grennd við Hrefnugötu mætti hafa fleiri hvalaheiti,“ segir hann og nefnir Búrhvalsgötu, Háhyrningsgötu og Steypireyðargötu.

Hann tekur þó fram að hann viti að „Hrefnugata er ekki kennd við hval“.

Karlagata gefur honum sömuleiðis tilefni til orðaleikja. Þar mætti að hans mati bæta við Hákarlagötu og Stórkarlagötu.

„Já, ég veit að hún er kennd við þrælinn Karla,“ bætir Eiríkur við.

Hann fer síðan enn lengra í hugmyndunum og beinir sjónum sínum að Vitastíg.

„Svo að farið sé aðeins lengra mætti skipta Vitastíg niður þannig að helmingurinn af honum héti Hálfvitastígur, eða oddatölumegin héti hann Oddvitastígur,“ stingur hann upp á í gríni.

Eiríkur virðist því hafa nóg af hugmyndum fyrir götunafnanefnd og lýkur færslunni á orðunum:

„Ég ætti líklega að bjóða mig fram í götunafnanefnd.“