Samtökin Áfram Ísland efna til fundar á Austurvelli fimmtudaginn 27. ágúst frá klukkan 17 til 18. Fundurinn er haldinn á lokametrum kosningabaráttunnar og er ætlað að sýna samstöðu þeirra sem telja framtíð Íslands best borgið utan Evrópusambandsins.

„Nú skiptir máli að mæta, standa saman og láta rödd okkar heyrast,“ segir í tilkynningu frá Áfram Íslandi, en samtökin leggjast gegn inngöngu Íslands í Evrópusambandið.

Á meðal ræðumanna á fundinum verða Katrín Jakobsdóttir, Auður Eir Vilhjálmsdóttir, Sigríður María Egilsdóttir og Áslaug Arna Sigurbjörnsdóttir.

Þá munu fulltrúar X-Nei, ungs fólks sem berst gegn aðild Íslands að Evrópusambandinu, einnig taka til máls. Þau eru Illugi Gunnarsson, Birta Karen Tryggvadóttir, Anton Sveinn McKee, Hrafn Splidt Þorvaldsson og Þórhildur Katrín Pálsdóttir.

Halldór Benjamín Þorbergsson mun stýra fundinum og Ágúst Þór Brynjarsson brekkusöngvari sér um tónlistaratriði.

Í tilkynningunni hvetja samtökin fólk til að mæta á Austurvöll með fjölskyldu og vinum og taka þátt í fundinum.

„Komdu með fjölskyldu og vinum og eigum saman góða stund í hjarta Reykjavíkur á lokametrum kosningabaráttunnar,“ segir jafnframt í tilkynningunni.