Læknir í Bandaríkjunum hefur boðist til að veita Michael Phillips, sem greinst hefur með svokallaðan örgetnaðarlim (micropenis), meðferð án endurgjalds eftir að saga hans vakti mikla athygli í fjölmiðlum.
Phillips hefur áður greint frá því að ástandið hafi veruleg áhrif á sjálfsmynd hans og daglegt líf. Hann segir getnaðarlim sinn aðeins um tæpur sentimetri að lengd og að hann eigi meðal annars erfitt með þvaglát. Hann hefur líkt stærð limsins við nögl á litla fingri sínum þegar hann er í stinningu.
Læknirinn David Dorfman segir að hann skilji hversu persónuleg og erfið slík vandamál geti verið. „Þau geta haft veruleg áhrif á sjálfsálit og sjálfstraust. Ef ég get hjálpað einhverjum að líða betur með sjálfan sig geri ég það gjarnan án endurgjalds,“ er haft eftir honum.
Phillips hafði nýlega stofnað söfnunarsíðu til að fjármagna stækkunaraðgerð á getnaðarlim. Hann hætti þó við söfnunina degi síðar eftir að hafa kynnt sér mögulegar áhættur hefðbundinna skurðaðgerða, meðal annars hættu á skertu næmi eða risvandamálum.
Í stað skurðaðgerðar hefur hann lýst áhuga á meðferð með fylliefnasprautum. Meðferð Dorfmans, sem nefnist „Mr. Big Shot“, felur í sér að fylliefni eru sprautuð í getnaðarliminn til að auka ummál hans. Samkvæmt lækninum tekur meðferðin um hálftíma, krefst lítillar sem engrar endurhæfingar og er aðeins framkvæmd að undangengnu læknismati þar sem metið er hvort viðkomandi henti fyrir meðferðina.
Dorfman segir markmið sitt vera að hjálpa fólki að auka sjálfstraust sitt með öruggri og einstaklingsmiðaðri meðferð.
Phillips vakti einnig athygli fyrr á þessu ári þegar hann sagðist íhuga að sækja um skráningu í Heimsmetabók Guinness vegna smæðar getnaðarlims síns. Ekki liggur fyrir hvort hann muni þiggja boð læknisins.
