Tuttugu árum eftir að kvikmyndin The Devil Wears Prada festi sig í sessi sem nútímaklassík í Bandaríkjunum, komu helstu leikarar hennar saman á ný á rauða dreglinum í New York í gær við frumsýningu nýju myndarinnar.
Meryl Streep snýr aftur í hlutverk hins kröfuharða tímaritsritstjóra Miröndu Priestly og var hún viðstödd ásamt Anne Hathaway, Emily Blunt og Stanley Tucci. Í viðtölum við fjölmiðla sögðust leikararnir hafa upplifað það sem eðlilegt skref að snúa aftur í þessi þekktu hlutverk, þrátt fyrir langan tíma frá útgáfu fyrri myndarinnar.
Í nýju myndinni er persóna Hathaway, Andy Sachs, orðin rótgróin í fjölmiðlaheiminum og starfar á ný hjá tímaritinu Runway. Þar þarf Miranda Priestly að takast á við breytt landslag fjölmiðla og hnignun prentmiðla. Spennan magnast þegar hún lendir í átökum við fyrrverandi aðstoðarkonu sína, Emily Charlton, sem nú gegnir lykilhlutverki í auglýsingageiranum.
Leikarahópurinn hefur verið stækkaður og má þar nefna Kenneth Branagh, sem leikur nýjan eiginmann Miröndu, auk þeirra Simone Ashley og Lucy Liu sem einnig koma fram í myndinni.
Tíska var í forgrunni á frumsýningunni, líkt og við var að búast, og vakti klæðnaður leikaranna sérstaka athygli. Þá hefur verið greint frá því að fatnaður og fylgihlutir sem notaðir eru í myndinni verði boðnir upp til styrktar nefndinni Committee to Protect Journalists.
Leikararnir þökkuðu jafnframt áhorfendum fyrir tryggðina í gegnum árin og töldu að áhugi þeirra hefði átt stóran þátt í að framhaldið varð að veruleika.
Myndin verður frumsýnd í kvikmyndahúsum 1. maí og er vænting mikil meðal aðdáenda. Fyrri myndin frá árinu 2006 er enn talin ein áhrifamesta ádeila á tísku- og fjölmiðlaiðnaðinn í Bandaríkjunum.
