Sjálfstæðismenn í Reykjavík eru í nokkrum meðbyr nú þegar líður að kosningum og kannanir benda til þess að flokkurinn, undir stjórn Hildar Björnsdóttur, gæti orðið stærsti flokkurinn í Reykjavík. Þetta er nokkuð athyglisvert í ljósi þess sundurlyndis sem hefur ríkt innan borgarstjórnarflokksins.
Hlerunarmál Hildar, þar sem leynilegar upptökur voru til af samtölum við borgarfulltrúa, urðu til þess að borgarfulltrúar funduðu án leiðtoga síns og ræddu af fúlustu alvöru að kæra Hildi til lögreglunnar. Þetta var ekki síst að frumkvæði Helga Áss Grétarssonar varaborgarfulltrúa.
Horfið var frá áformunum þegar Ragnhildur Alda Vilhjálmsdóttur, annar maður á lista flokksins, lagði ekki í þann slag að kæra leiðtogann. Henni var samt refsað með því að vera færð niður í fjórða sæti eftir mikil átök um uppröðun. Guðlaugur Þór Þórðarson alþingismaður hefur að tjaldabaki leitt andstöðuna gegn Hildi.
Honum tókst ekki að verja sitt fólk, borgarfulltrúana Mörtu Guðjónsdóttur og Kjartan Magnússon, sem var skolað út af listanum í hreinsunum. Guðlaugur Þór og hulduher hans gerðu þá málamiðlun að sá hvílufúsi gleðigjafi Brynjar Níelsson, fyrrverandi þingmaður, fékk að vera í þriðja sæti listans og er þannig öruggur um tekjur upp á hartnær tvær milljónir króna á mánuði næstu fjögur árin ...
