Nathan Lane, einn þekktasti sviðs- og kvikmyndaleikari Bandaríkjanna, var í viðtali á dögunum hjá Howard Stern þar sem hann opnaði sig um persónuleg málefni, þar á meðal erfiða stund þegar hann sagði móður sinni að hann væri samkynhneigður en það var árið 1975.
Lane segist aldrei munu gleyma þeirri reynslu. „Ég vildi ekki segja henni það, en áður en ég fór höfðum við gengið í gegnum svo margt saman og ég hafði aldrei logið að henni. Þannig að ég settist niður með henni og sagði: „Sjáðu til, ég veit að þú heldur að ég hafi verið að hitta stelpu, en í raun hef ég verið að hitta strák“.“
Hann rifjar upp að móðir hans hafi svarað: „Áttu við að þú sért samkynhneigður?“
„Ég hafði aldrei heyrt það orðað svona áður,“ sagði Lane.
„Og ég sagði: „Já, ég held það.“ Hún sagði það ekki af illsku eða reiði heldur með ákveðinni sorg: „Ég vildi frekar að þú værir dáinn“.“
Lane segist hafa brugðist snöggt við og svarað: „Ég vissi að þú myndir skilja.“
Leikarinn, sem er 70 ára og meðal annars þekktur fyrir hlutverk sitt í Only Murders in the Building og Birdcage, segir mikilvægt að horfa á viðbrögð móður sinnar í samhengi við tímann. „Þú verður að skilja að þetta var önnur kynslóð. Þetta var ekki manneskja sem var upplýst á þann hátt.“
Hann, sem hefur starfað sem leikari frá því snemma á níunda áratugnum og hefur hlotið Emmy-verðlaun, segir að þetta samtal hafi verið það erfiðasta sem hann hafði gert á þeim tíma.
„Mér fannst ég þurfa að gera þetta. Ég þurfti að vera heiðarlegur við hana,“ sagði hann. „Ég hélt einhvern veginn að hún myndi skilja, en hún gerði það ekki.“
Viðbrögð innan fjölskyldunnar voru þó ekki öll á sama veg. „Bróðir minn virtist ekkert kippa sér upp við þetta. Hann sagði bara: „Ég elska þig sama hvað“.“
Lane kom opinberlega út árið 1999 í viðtali við The Advocate, þremur árum eftir að hann vakti mikla athygli fyrir hlutverk sitt í kvikmyndinni The Birdcage, sem Mike Nichols leikstýrði, ásamt Robin Williams og Gene Hackman.
Hann sagði að ákvörðun hans um að stíga fram hefði meðal annars verið undir áhrifum af örlögum Matthew Shepard, 21 árs manns sem var myrtur fyrir að vera samkynhneigður.
