Njáll Torfason aflraunamaður lést þann 1. apríl, á Maspalomas á Kanaríeyjum, 75 ára að aldri.
Njáll fæddist 28. febrúar 1950 en foreldar hans voru Torfi Bryngeirsson, afreksmaður í frjálsum íþróttum og Jóhanna Pétursdóttir húsfreyja.
Fram kemur í frétt mbl.is um andlátið að Njáll hafi unnið við ýmis störf um ævina, stundaði sjómennsku um árabil, starfaði einnig sem heilari, nuddari og rak hótel og söluskála í Breiðdalsvík um tíma, þar sem hann bjó með konu sinni, Kristínu.
Njáll varð þjóðþekktur fyrir margskonar aflraunir og sló hann þar nokkur Íslandsmet. Hann keppti og kom fram á sýningum bæði hér á landi og erlendis.
Njáll bjó yfir einstökum hæfileikum en meðal þeirra aflrauna var að draga bíla og rútu með einungis löngutöng og einnig gat hann losað sig úr fjötrum, gengið berfættur á glerbrotum og glóðum og lyft níðþungum hlutum, þar á meðal 278 kílóa Laufássteini með annarri hendi. Þá virtist hann nota hugarorkuna til þess að festa á sig hluti, til dæmis úr postulíni og járni. Þá er einnig þekkt þegar hann reif tíu símaskrár í sundur á 16 sekúndum.
Hann starfaði í Sálarrannsóknarfélagi Íslands og tók til að mynd að sér að reka óvætti úr húsum en í viðtali við Morgunblaðið árið 2013 sagðist hann aldrei hafa kallað sig miðil en að hann væri þó skyggn.
Njáll giftist þrisvar sinnum en eftirlifandi eiginkona hans er Kristín G. Ársælsdóttir, fædd 1953. Þau hafa verið búsett á Kanaríeyjum undanfarin ár. Dóttir þeirra er Jóhanna, fædd 1982 og sonur Kristínar er Einar Geirsson, fæddur 1972. Njáll eignaðist tvö börn með Aðalheiði L. Aradóttur, fædd 1951, þau Arnheiði Hönnu, fædd 1970 og Njál Heiðar, fæddur 1972. Börn Njáls og Kolbrúnar Björnsdóttur, fædd 1952, eru einnig tvö, þau Jón Björn Njálsson, fæddur 1974 og Harpa Hrund Bjarnadóttir, fædd 1978. Barnabörnin eru 16 og eitt barnabarnabarn.
