Björn Brynjúlfur Björnsson, framkvæmdastjóri Viðskiptaráðs Íslands, telur að ráðið hafi tekið á sig of mikla sök í kjölfar bankahrunsins árið 2008. Þetta kemur fram í viðtali við Heimildina þar sem hann ræðir meðal annars gagnrýni á starfsemi ráðsins og lærdóminn af hruninu.
Viðskiptaráð sætti mikilli gagnrýni eftir hrunið og var þáttur þess meðal annars tekinn til umfjöllunar í skýrslu Rannsóknarnefndar Alþingis. Gagnrýnin sneri meðal annars að áhrifum ráðsins á stjórnvöld, áherslu á minni reglusetningu og skýrslum sem unnar voru um íslenska fjármálakerfið fyrir hrun.
Viðskiptaráð viðurkenndi árið 2011 að hafa átt þátt í því ástandi sem skapaðist í aðdraganda hrunsins. Björn telur þó að ráðið hafi síðar tekið á sig meiri ábyrgð en efni stóðu til.
„Já, ég myndi segja að við höfum bara lært mikið af hruninu eins og aðrir,“ svarar Björn.
Hann bendir á að fall Lehman Brothers og lausafjárþurrð á alþjóðlegum fjármálamörkuðum hafi haft víðtæk áhrif. Íslenska bankakerfið og þjóðarbúið hafi jafnframt verið mjög skuldsett þegar áfallið reið yfir.
Björn nefnir sérstaklega svonefndar Mishkin- og Porter-skýrslur sem Viðskiptaráð kom að fyrir hrun. Hann telur þær að mörgu leyti hafa verið vandaðar þótt niðurstöðurnar hafi reynst of bjartsýnar.
„Menn í rauninni töldu þol bankanna til að standast áföll hafa verið meira en það var og að fjármálakerfið væri traustara en svo reyndist,“ segir Björn.
Hann telur yfirlýsingu Viðskiptaráðs frá árinu 2011 bera þess merki að sjálfsgagnrýnin eftir hrun hafi gengið of langt. Skýrslurnar hafi ekki valdið efnahagshruninu heldur hafi meðal annars mikil skuldsetning og veikleikar í fjármálaeftirliti vegið þar mun þyngra.
