Nokkuð var um umferðarlagabrot hjá lögreglunni á höfuðborgarsvæðinu í gærkvöldi og nótt. Meðal annars voru ökumenn stöðvaðir undir áhrifum vímuefna og án ökuréttinda, auk þess sem einstaklingur féll af rafhlaupahjóli á mikilli ferð.

Lögregla stöðvaði ökumann við almennt eftirlit sem reyndist vera undir áhrifum vímuefna og án ökuréttinda. Hann var handtekinn og fluttur á lögreglustöð þar sem málið var tekið til hefðbundinnar meðferðar. Honum var sleppt að henni lokinni.

Annar ökumaður var stöðvaður við almennt eftirlit og kom þá í ljós að hann hafði verið sviptur ökuréttindum. Málið var afgreitt með vettvangsskýrslu.

Þá barst lögreglu tilkynning um bifreið sem ekið var með glæfralegum hætti í vesturhluta Reykjavíkur. Lögreglumenn höfðu uppi á bifreiðinni og reyndist ökumaður hennar einnig vera án ökuréttinda. Málið var afgreitt með vettvangsskýrslu.

Lögreglu var jafnframt tilkynnt um einstakling sem féll af rafhlaupahjóli á mikilli ferð. Ekki lágu fyrir upplýsingar um umfang meiðsla þegar dagbók lögreglu var send út.

Í öðru umferðarslysi hafði bifreið verið ekið á ljósastaur. Engin slys urðu á fólki en bifreiðin varð fyrir tjóni.

Enn einn ökumaður var stöðvaður við almennt eftirlit og reyndist hann undir áhrifum vímuefna. Hann var handtekinn og færður á lögreglustöð en sleppt að lokinni hefðbundinni málsmeðferð.

Lögregla hafði einnig afskipti af ökumanni vegna filma í framrúðum bifreiðar hans. Vettvangsskýrsla var rituð og bifreiðin boðuð í skoðun á eftirlitsstöð.

Auk umferðarmálanna var tilkynnt um þjófnað úr verslun og er málið til rannsóknar. Þá barst tilkynning vegna samkvæmishávaða og var húsráðanda gert að virða svefnfrið annarra.