Nýkjörinn forsætisráðherra Ungverjalandi hefur lýst því yfir að hann muni stöðva úrsögn landsins úr Alþjóðlega sakamáladómstólnum (ICC).

Peter Magyar, sem er á leiðinni í embætti eftir sögulegan kosningasigur fyrr í mánuðinum og þar með lok 16 ára valdatíma Viktor Orbán, tilkynnti þetta á blaðamannafundi í Búdapest. Samhliða sendi hann viðvörun til Benjamin Netanyahu.

Aðild að dómstólnum þýðir að einstaklingar sem eru eftirlýstir af honum geta verið handteknir ef þeir koma til Ungverjalands.

Magyar sagðist hafa gert Netanyahu þetta ljóst. Ísraelski forsætisráðherrann hefur verið eftirlýstur síðan 2024 vegna meintra stríðsglæpa á Gaza.

Orbán hafði tilkynnt um úrsögn Ungverjalands úr ICC á síðasta ári, meðal annars vegna andstöðu sinnar við handtökuskipunina á hendur Netanyahu.

Átti úrsögnin að taka gildi 2. júní og gera Ungverjaland að eina ríki Evrópusambandsins sem viðurkennir ekki lögsögu dómstólsins. Magyar, leiðtogi mið-hægri flokksins Tisza, sagði hins vegar að teymi hans hefði farið yfir málið og að úrsögnin yrði stöðvuð.

„Ég tel að ef land er aðili að Alþjóðlega sakamáladómstólnum og einstaklingur sem er eftirlýstur af honum kemur inn á yfirráðasvæði þess, þá beri að handtaka viðkomandi,“ sagði hann og vísaði til Netanyahu.

Handtökuskipunin á hendur Netanyahu var harðlega gagnrýnd á sínum tíma af þáverandi forseta Bandaríkjanna, Joe Biden. Eftirmaður hans, Donald Trump, hefur haldið áfram að styðja Netanyahu eindregið.

Bandaríkin eru ekki aðilar að ICC og Netanyahu hefur ítrekað heimsótt bæði Washington og heimili Trumps í Flórída, meðal annars áður en hernaðaraðgerðir gegn Íran hófust.

Trump og Netanyahu hafa jafnframt verið stuðningsmenn Orbáns og vonuðust til að hann héldi völdum áfram, þar til hann beið ósigur í kosningunum.