Menningar-, nýsköpunar- og háskólaráðherra, Logi Einarsson, fundaði í síðustu viku með fulltrúum tæknifyrirtækisins Apple í höfuðstöðvum þess í Battersea í London. Tilefni fundarins var að óska eftir því að íslenska yrði tekin upp sem valmál í iOS-stýrikerfi fyrirtækisins, en sem stendur eru engin tæki frá Apple fáanleg með íslensku notendaviðmóti.

Á fundinum lagði ráðherra áherslu á mikilvægi þess að íslenskan, sem varðveist hefur í yfir þúsund ár, þróist í takt við tækniframfarir samtímans. Hann benti á að aðgengi að nýjustu tækni á móðurmáli skipti sköpum, ekki síst í samhengi við jafnt aðgengi allra að stafrænum lausnum.

Í því samhengi afhenti ráðherra fulltrúum Apple formlega áskorun fyrir hönd ÖBÍ, þar sem fyrirtækið er hvatt til að innleiða íslensku í stýrikerfi sín. Með því gæti Apple, að mati ráðherra og ÖBÍ, styrkt stöðu tungumálsins í stafrænum heimi og jafnframt staðið vörð um eitt af yfirlýstum kjarnagildum sínum, aðgengi fyrir alla notendur.

„Íslensk menning er einstök og gerir sig gildandi hvar sem er í heiminum. Við erum ekki mörg en við erum fær í mörgu. Það kom upp sú hugmynd að enda fundinn á að bera Apple kveðju frá sameiginlegum vinum Apple og íslenskunnar með stuttu myndbandi. Að íslenskum sið var hóað í sameiginlega vini án fyrirvara og þeir beðnir að senda kveðju sem tókst svona glimrandi vel og vakti mikla lukku viðstaddra,“ segir Logi.

„Það er einstök fegurð fólgin í því að þegar kemur að tungumálinu okkar erum við sammála um að hlúa að þessari gersemi svo hún vaxi og dafni með okkur um ókomna tíð. Ég er ákaflega þakklátur þeim listamönnum sem aðstoðuðu okkur í að koma þessari kveðju saman og öllum þeim sem standa vörð um tungumálið okkar dagsdaglega með ýmsum hætti,“