Páll Ásgeir Ásgeirsson, rithöfundur og fyrrum blaðamaður, vandar Reykjavik Excursions ekki kveðjurnar í pistli sem hann ritar á samfélagsmiðla en rithöfundurinn nýtti sér þjónustu fyrirtæksins þegar kom heim til Íslands eftir ferðalag.
„Eftir að hafa ferðast með flugvélum, leigubílum, þriggja hjóla túktúk bílum og lestum hingað og þangað um heiminn síðustu sex vikurnar þá var visst áfall að fara síðasta legginn með Reykjavik Excursions eða Icelandia eða hvað þetta einokunarskítafyrirtæki heitir,“ skrifar Páll um fyrirtækið. Segir hann þjónustulund Reykjavik Excursions ekki neina þar sem fyrirtækið þurfi hafi ekki neina alvöru samkeppni að flytja fólk frá Keflavíkurflugvelli.
„Ég sá engin skilti þar sem ég staulaðist í slabbi, kulda og myrkri út að illa upplýstum skýlum þar sem fólki er smalað saman. Rútan fer svo þegar hvert sæti er skipað án þess að nokkur maður ávarpi farþega eða bjóði þá velkomna,“ skrifar rithöfundurinn.
„Hitt er samt verra að fyrir fólk af minni stærð er svo svívirðilega stutt á milli sætanna að maður situr samankrepptur og þvingaður með gigtveika hnjáliði í járnavirki næsta sætis fyrir framan meðan rútan skröltir yfir klakahryggi og skorninga illa mokaðra gatna.“
Páll segir að þetta minni meira á gripaflutninga í þriðja heiminum en það sem kemur fram í auglýsingum Reykjavik Excursions.
„Mér finnst þetta algerlega óboðleg framkoma við farþega. Þetta sagði ég við bílstjórann þegar ég sótti töskuna í lestina og hann yppti öxlum og sagðist oft hafa heyrt þetta en bætti svo við: Það er ekkert sem við getum gert,“ skrifar Páll að lokum.
