Tesla er snúin aftur í fyrsta sætið sem mest seldi bíllinn á Íslandi, þrátt fyrir hrun víða í Evrópu í sölu vegna stjórnmálaþátttöku Elons Musk, sem vill veg hægri öfgaflokka sem mestan.

Nýjar innflutningstölur fyrir bifreiðar sýna að 92 Teslur voru fluttar til landsins í mars, sem skákar þannig Kiu í mánuðinum. Þar af eru 82 af undirtegundinni Tesla Y, en ný útgáfa er nú komin í sölu.

Rafbílaeigendur og -unnendur í hópnum Rafbílar á Íslandi skiptast í tvær fylkingar vegna þróunarinnar. „Markaðurinn var að bíða eftir nýja Y og nú er toppnum náð aftur,“ segir einn þeirra sem ræsti eldfima umræðu um málið. „Einstaka fúlmenni kalla Tesluna þó nasistabíla, en þeir verða bara að versla Kína bíla af heiðursmönnunum þar niður frá.“

Íslendingar bregðast öðruvísi við

Ísland sker sig þannig að einhverju leyti frá öðrum Evrópuríkjum, þó sölutölur eigi eftir að sýna stöðu nýrrar Teslu Y. Í Þýskalandi sýnir ný könnun að 94% svarenda myndi ekki kaupa Teslu. Sala á Teslu í Þýskalandi féll um 41% strax árið 2024 miðað við 2023, þrátt fyrir 27% aukningu á rafbílasölu á því ári. Sölufallið jókst í 70% fyrstu tvo mánuði á árinu 2025.

Bjarni Jónsson, fyrrverandi formaður lífsskoðunarfélagsins Siðmenntar, gefur skýrt stefnuljós í umræðu rafbílaunnenda. „Það er áhugavert að lesa þessi ummæli ykkar. Það er til nokkuð sem heitir siðferði og að maður setur sér ákveðin viðmið til að lifa eftir. Valið stendur á milli þess að standa með siðrænni nálgun í því hvernig maður beitir kauphegðun sinni sem er í línu við siðferðileg eigin viðmið. Eða að gefa dauðann og djöful í allt slíkt og stilla kauphegðun sinni óháð því sem gerist í kringum mann í heiminum. Maður hefur val og get t d nefnt Teslu sem dæmi. Á maður að styðja við auðugasta mann veraldar sem er einræðis sinni og nasisti eða ekki. Við höfum valið!“ Við ummælin birtast tíu aðhlæjendur en 93 viðlíkendur, þegar þetta er skrifað.

Rafskautuð umræða

Umræða rafbílamanna speglar víðari pólaríseringu í samfélaginu hér sem vestanhafs. „Elon Musk er að hjálpa við að skera niður í ríkisútgjöldum í BNA. Skoðið málið hlutlaust en ekki bara trúa RÚV sem er með mikla vinstri slagsíðu. Þetta nasistabull er tilbúningur andstæðinga repúblikana,“ segir einn vel gíraður Eyjamaður úr sjávarútvegsgeiranum.

Þá kemur einn þeirra vinstra megin frá en fer á miðakrein. „Ég skil það að vilja ekki selja Tesluna sína vegna þess að forstjórinn er ómenni. Ég er ánægður með Tesluna mína, og þó ég sé minna ánægður með hana vegna Elon Musk að þá er staðreyndin sú að ég fæ hvergi jafn góðan bíl fyrir peninginn. En það sem ég skil ekki að fólk haldi áfram að verja hann og ég velti því fyrir mér hvaða grimmdarverk þarf hann að fremja til þess að sumir hérna inni fara að gagnrýna hann þrátt fyrir að eiga Teslu.“

Tesla Y er þjóðarbíllinn

Tesla kemur mun betur út í ár í sölu heldur en á sama tímabili í fyrra, þegar Toyota og Renault tróndu á toppnum. Árið þar áður, 2023, kom Tesla skammt á eftir Toyotu, með 373 innflutta bíla miðað við 459 Toyotur.

Þess ber að geta að af öllum undirtegundum bifreiða er Tesla Y langmest seldi bíllinn á Íslandi frá 1. janúar 2022. Hafa 4.876 eintök verið nýskráð, en aðeins 2.903 af næstvinsælasta bílnum, sem er túristatryllirinn Dacia Duster. Nú kemur í ljós hvort rafmagnað andrúmsloftið í kringum Elon Musk muni stöðva frekari framgang Teslu Y meðal Íslendinga.