Vegna alvarlegs umferðarslyss sem átti sér stað við Hofsós á föstudagskvöld hefur verið boðað til samverustundar í Fjölbrautarskóla Norðurlands vestra (FNV). Í slysinu slösuðust fjórir ungir menn, 17 og 18 ára að aldri, alvarlega.
Allir drengirnir voru fluttir á gjörgæsludeild Landspítalans en tveir þeirra hafa nú verið útskrifaðir þaðan.
Þorkell Þorsteinsson, settur skólameistari FNV, segir slysið hafa haft djúpstæð áhrif á samfélagið.
„Við búum í litlu samfélagi þar sem svona atvik snerta marga, sérstaklega jafnaldra drengjanna,“ segir hann í samtali við RÚV.
Drengirnir voru á leið í samkvæmi á Hofsósi ásamt öðrum ungmennum þegar slysið varð. Um 30 ungmenni voru á vettvangi og fengu þau áfallahjálp frá viðbragðsaðilum.
Vegna páskafrís er ekki hefðbundið skólahald í vikunni, en Þorkell segir samverustundina vera tækifæri fyrir nemendur og aðra til að hittast, ræða atburðinn og veita hvert öðru stuðning.
Samverustundin fer fram í bóknámshúsi skólans þriðjudaginn 16. apríl klukkan 17.
