Bandaríski öldungadeildarþingmaðurinn Mark Kelly segir að næsti forseti Bandaríkjanna muni þurfa að taka til eftir Donald Trump, en hann er ekki að vísa til stefnumála heldur innréttinga í Hvíta húsinu.

Kelly var spurður út í breytingar Trumps á skrifstofu forsetans, þar sem gullskreytingar hafa verið áberandi. Hann var ómyrkur í máli og sagði að sá sem tæki við embætti myndi „rífa þetta gulldrasl af veggjunum og endurheimta reisn skrifstofunnar“.

Þingmaðurinn, sem hefur verið nefndur sem mögulegur forsetaframbjóðandi árið 2028, bætti við að jafnvel forseti úr röðum Repúblikana myndi líklega fjarlægja slíkar skreytingar. Að hans mati eigi slíkur íburður frekar heima í konungshöll en í „húsi fólksins“.

Kelly dró einnig í efa að gullið væri ekta og sagði líklegt að það væri einfaldlega málning eða skraut úr verslun.

Hann gagnrýndi jafnframt Trump fyrir að leggja áherslu á yfirborðslega hluti sem skipta almenning litlu máli. Hann sagði að kjósendur í heimaríki sínu, Arizona, hefðu meiri áhyggjur af daglegum vandamálum, eins og hækkandi bensínverði og því hvernig þeir komi börnum sínum í nauðsynlegar læknismeðferðir.