Arturas Leimontas hefur verið dæmdur í þriggja mánaða skilorðsbundið fangelsi fyrir kynferðislega áreitni gagnvart unglingsstúlku á bráðamóttöku Landspítalans í Fossvogi sumarið 2024.
Samkvæmt dóminum átti atvikið sér stað að kvöldi 15. júní 2024 þegar stúlkan hafði verið flutt á bráðamóttökuna í mjög ölvuðu og meðvitundarskertu ástandi. Leimontas, sem einnig var sjúklingur á bráðamóttökunni og undir áhrifum áfengis, veitti stúlkunni ítrekaða athygli þar sem hún lá í sjúkrarúmi á gangi deildarinnar.
Vitni, meðal annars hjúkrunarfræðingar, sjúkraliðar og öryggisvörður, lýstu því fyrir dómi að Leimontas hefði kysst stúlkuna á munninn og sett fingur í munn hennar. Einnig kom fram að starfsfólk hefði brugðist við háttseminni með því að færa hann frá stúlkunni og kalla til lögreglu.
Leimontas neitaði sök fyrir dómi og sagði að hann hefði einungis verið að reyna að róa stúlkuna og aðstoða hana. Dómurinn taldi þær skýringar ótrúverðugar í ljósi framburðar vitna og annarra gagna málsins. Þá taldi dómurinn sannað að háttsemi hans hefði falið í sér kynferðislega áreitni og ruddalegt athæfi gagnvart barni samkvæmt almennum hegningarlögum og barnaverndarlögum.
Refsing Leimontas var ákveðin þriggja mánaða fangelsi en fullnustu hennar frestað til tveggja ára gegn almennu skilorði. Þá var honum gert að greiða brotaþola 400 þúsund krónur í miskabætur auk rúmlega tveggja milljóna króna í sakarkostnað.
