Skóla- og frístundasvið Reykjavíkurborgar hefur ekki sett sérstakar reglur um notkun snjallgleraugna í grunnskólum borgarinnar. Sviðið telur þó að slík tæki falli undir almennar reglur um notkun snjalltækja í skólastarfi.
Þetta segir Steinn Jóhannsson, sviðsstjóri skóla- og frístundasviðs Reykjavíkurborgar, í viðtali við Mannlíf. Umræðan um snjallgleraugu í skólum hefur aukist eftir að yfirvöld í Osló bönnuðu nýverið notkun slíkra gleraugna í skólum borgarinnar.
Snjallgleraugu gera notendum kleift að taka myndir og myndbönd, hlusta á tónlist, taka við símtölum, þýða skilti á erlendum tungumálum, varpa texta eða kortum inn í sjónsvið notandans, auk þess að eiga samskipti við innbyggðan gervigreindaraðstoðarmann.
Steinn segir tækniframfarir kalla á að skólayfirvöld og einstakir skólar endurmeti reglulega hvernig tryggja megi öryggi, friðhelgi og velferð barna í skólastarfi. Snjallgleraugu falli í raun undir sama flokk og önnur snjalltæki sem geta tekið upp eða miðlað efni.
Hann bendir á að ný reglugerð um notkun síma og snjalltækja á skólatíma í grunnskólum taki einnig til snjallúra og annarra sambærilegra tækja. Markmið reglnanna sé meðal annars að stuðla að námsfriði, vellíðan, öryggi og jákvæðum samskiptum innan skólasamfélagsins.
Hann segir símafrí hafa þegar verið innleitt í nær öllum grunnskólum Reykjavíkur og almennt er gert ráð fyrir að nemendur noti ekki persónuleg snjalltæki á skólatíma nema sérstakar undanþágur eða kennslufræðilegar ástæður séu fyrir hendi.
Steinn segir jafnframt að upptökur af starfsfólki eða nemendum án vitundar þeirra geti varðað bæði skólareglur og reglur um persónuvernd. Slík háttsemi geti verið brot á skólareglum og, eftir atvikum, persónuverndarlöggjöf.
„Að svo stöddu hefur skóla- og frístundasvið ekki sett sérstakar reglur sem beinast eingöngu að snjallgleraugum, en lítur svo á að þau falli undir þær almennu reglur sem gilda um notkun snjalltækja í skólastarfi,“ segir Steinn.
