Dómsmálaráðuneytið hefur birt í samráðsgátt stjórnvalda frumvarp sem felur í sér umfangsmiklar breytingar á löggjöf með það að markmiði að efla baráttuna gegn skipulagðri brotastarfsemi hér á landi.
Í frumvarpinu eru lagðar til tólf breytingar á refsilöggjöf, réttarfarsreglum og lögreglulögum. Meðal annars er gert ráð fyrir þyngri refsingum, auknum rannsóknarheimildum lögreglu og rýmri heimildum stjórnvalda til að gera ólögmætan ávinning af brotastarfsemi upptækan.
Hámarksrefsing fyrir þátttöku í skipulagðri brotastarfsemi yrði samkvæmt frumvarpinu hækkuð úr fjögurra ára fangelsi í átta ár. Þá er lagt til að hugtakið skipulögð brotastarfsemi verði skilgreint með skýrari hætti og gildissvið þess víkkað.
Jafnframt er gert ráð fyrir þyngri refsingum þegar börn eða ungmenni eru hagnýtt við framkvæmd alvarlegra brota. Heimild til gæsluvarðhalds í flóknum og umfangsmiklum sakamálum yrði einnig lengd úr tólf vikum í allt að sex mánuði.
Þá yrði lögreglu veitt heimild til að grípa til tiltekinna rannsóknaraðgerða áður en dómsúrskurður liggur fyrir. Einnig er lagt til að hægt verði að gera verðmæti upptæk án sakfellingar fyrir tiltekið brot ef ætla má að þau séu ávinningur af refsiverðri háttsemi.
Samkvæmt skýrslu greiningardeildar ríkislögreglustjóra frá því í nóvember eru um tuttugu skipulagðir brotahópar starfandi hér á landi. Umfang starfseminnar hefur aukist undanfarin ár og átök milli hópa, ofbeldisbrot og vopnalagabrot orðið meira áberandi.
Frumvarpið verður lagt fram á komandi þingvetri og er hluti af aðgerðum stjórnvalda gegn skipulagðri brotastarfsemi.
„Skipulögð glæpastarfsemi er ógn við öryggi okkar allra og með þessu frumvarpi stígum við markviss skref til að taka á þessum hópum af meiri þunga. Við herðum refsingar, styrkjum heimildir lögreglu og gerum yfirvöldum kleift að ráðast að hagnaðinum sem drífur starfsemina áfram. Þannig veikjum við fjárhagslegan grundvöll glæpahópanna og getu þeirra til að vaxa og festa sig í sessi í íslensku samfélagi,“ segir Þorbjörg S. Gunnlaugsdóttir dómsmálaráðherra.
