Menningar-, nýsköpunar- og háskólaráðuneytið hefur auglýst eftir umsóknum um styrki til einkarekinna staðbundinna fjölmiðla utan höfuðborgarsvæðisins. Til úthlutunar á þessu ári eru samtals 15 milljónir króna, en umsóknarfrestur er til miðnættis þriðjudaginn 1. október næstkomandi.

Styrkjunum er ætlað að efla starfsemi staðbundinna fjölmiðla og styðja við mikilvægt hlutverk þeirra. Markmiðið er að tryggja aðgengi almennings að upplýsingum um menningar- og samfélagsmál í heimabyggð, sem og að efla menningarstarf og lýðræðisþátttöku í samræmi við reglur ráðuneytisins.

Fjármögnun styrkjanna skiptist þannig að 12,5 milljónir króna koma frá menningar-, nýsköpunar- og háskólaráðuneytinu og 2,5 milljónir króna frá innviðaráðuneyti, en síðarnefnda fjárhæðin tengist sérstakri aðgerð í byggðaáætlun um eflingu fjölmiðlunar í héraði.

Styrkirnir eru eingöngu ætlaðir miðlum utan höfuðborgarsvæðisins, en það svæði nær yfir Reykjavík, Kópavog, Hafnarfjörð, Garðabæ, Seltjarnarnes og Mosfellsbæ.