Bandarísku hjónin John Herb Hayes III, sjötugur, og Geordyn Nichole Hayes, 31 árs, hafa verið handtekin og ákærð fyrir grófa vanrækslu og að stofna lífi barns í hættu. Handtakan á sér stað í kjölfar þess að fimm ára einhverf og mállaus dóttir þeirra, Saylor Hayes, fannst látin eftir að hafa drukknað á Pawleys Island í Suður-Karólínu þann 31. ágúst síðastliðinn.
Lögregluyfirvöld í Suður-Karólínu og Tennessee lýsa yfir þungum áhyggjum af málavöxtum en rannsókn bendir til þess að andlát stúlkunnar hafi mátt rekja til ásetnings eða alvarlegs hirðuleysis foreldranna.
Fjarlægðu öryggisbúnað stúlkunnar og leyndu honum
Samkvæmt gögnum lögreglu glímdi stúlkan við alvarlega einhverfu og átti það til að strjúka að heiman og dragast að því að fara að vatninu. Af þeim sökum bar hún sérstakt úlnliðsband á vegum Project Lifesaver, sem sendir út staðsetningarmerki svo lögregla geti fljótt fundið einstaklinga með vitræna skerðingu ef þeir týnast.
Rannsókn leiddi í ljós að foreldrarnir höfðu klippt öryggisbandið af stúlkunni áður en fjölskyldan lagði af stað í ferðalag frá heimili sínu í Virginíu. Lögreglan fann tækið síðar falið inni í bifreið á heimili þeirra.
Afvegaleiddu björgunarsveitir og flúðu af vettvangi
Stúlkan var tilkynnt týnd frá sumarhúsi fjölskyldunnar þann 30. ágúst. Í ljós kom að hún hafði verið skilin eftir án eftirlits í tæplega 15 metra fjarlægð frá vatni.
Á meðan á umfangsmikilli leit stóð sökuðu yfirvöld hjónin um að hafa beint leitarfólki og björgunarsveitum markvisst í ranga átt og fjarri vatninu þar sem stúlkan fannst á endanum látin morguninn eftir. Þá hvöttu foreldrarnir björgunarfólk til að nota móttökubúnað til að leita að merki tækisins, þrátt fyrir að vita að þau hefðu sjálf klippt það af henni.
Skömmu eftir að lík stúlkunnar fannst flúðu hjónin af vettvangi í Suður-Karólínu. Þau voru handtekin degi síðar af lögreglunni í Carter-sýslu í Tennessee.
Bíða framsals
Hjónin, sem giftu sig árið 2021 og eiga þrjú börn saman, sitja nú í gæsluvarðhaldi í Tennessee þar sem þau bíða þess að verða framseld til Suður-Karólínu til að mæta ásökunum fyrir dómi. Málið hefur vakið gríðarlega athygli vestanhafs, bæði vegna alvarleika ásakananna og mikils aldursmunar hjónanna.
