Rússneskar leyniþjónustustofnanir undirbúa með virkum hætti skemmdarverk í Danmörku og beinast áformin einkum að dönskum varnariðnaði. Þetta kemur fram í mati dönsku öryggis- og leyniþjónustunnar PET.

Í yfirlýsingu PET til AFP segir að rússneskar leyniþjónustur hafi meðal annars reynt að fá almenna danska borgara til samstarfs í gegnum samfélagsmiðla. Fólk sé fengið til að taka ljósmyndir af tilteknum stöðum sem síðar geti nýst við undirbúning skemmdarverka.

Emil Græsholm, yfirmaður gagnnjósnadeildar PET, segir í samtali við danska dagblaðið Berlingske að stofnunin hafi ákveðið að greina opinberlega frá aðferðum Rússa þar sem þær séu oft mun einfaldari en almenningur kunni að gera sér í hugarlund.

Viðvörunin kemur á sama tíma og ríki Evrópusambandsins hafa kallað rússneska sendifulltrúa á sinn fund og rætt mögulegar nýjar refsiaðgerðir gegn Rússlandi. Tilefnið er meðal annars atvik í Þýskalandi þar sem dróni með sprengiefni kom við sögu.

Rússnesk stjórnvöld hafa undanfarna mánuði ítrekað verið sökuð um að standa að eða undirbúa skemmdarverk í Evrópuríkjum sem hafa stutt Úkraínu í stríðinu gegn Rússlandi.

PET hafði þegar árið 2024 varað við því að ógn af hálfu Rússlands gagnvart Danmörku færi vaxandi.