Björn Ingi Helgason hefur verið dæmdur í tveggja ára og sex mánaða fangelsi í Héraðsdómi Norðurlands eystra fyrir nauðgun á konu á Akureyri í apríl 2024. Honum var jafnframt gert að greiða konunni tvær milljónir króna í miskabætur og rúmar fjórar milljónir í sakarkostnað.
Samkvæmt ákæru höfðu Björn Ingi og konan verið í samskiptum áður en þau hittust að kvöldi 13. apríl 2024. Þau fóru saman í partí og síðar á bar áður en þau héldu heim til konunnar. Fyrir lá að kynferðisleg samskipti þeirra fyrr um kvöldið höfðu verið með samþykki beggja.
Konan lýsti því hins vegar að eftir heimkomuna hefði Björn Ingi orðið harkalegur og haldið kynferðislegum athöfnum áfram þrátt fyrir að hún hefði ítrekað beðið hann að hætta. Dómurinn taldi sannað að hann hefði meðal annars tekið hana kverkataki, slegið hana í andlitið, rifið í hár hennar og beitt hana öðru ofbeldi við kynferðismökin.
Björn Ingi neitaði sök en kvaðst lítið sem ekkert muna eftir atvikum á heimili konunnar vegna mikillar ölvunar. Dómurinn taldi framburð brotaþola hins vegar trúverðugan og stöðugan í meginatriðum. Hann hefði jafnframt fengið stoð í læknisfræðilegum gögnum, upptökum lögreglu og framburði vitna.
Brotaþoli hlaut líkamlega áverka og glímdi í kjölfarið við alvarlega áfallastreituröskun. Við ákvörðun refsingar var meðal annars horft til alvarlegra áhrifa brotsins á andlega heilsu hennar.
Björn Ingi var því dæmdur í tveggja og hálfs árs fangelsi, til greiðslu tveggja milljóna króna í miskabætur og 4.008.688 króna í sakarkostnað.
